Diahuebs anochi a tuma luga e apertura oficial di e exposicion “SITE–SIDE–SIGHT WALKS” di investigadora y artista di glas Bernadette van der Klooster na Museo Arqueologico Nacional Aruba (MANA). E evento a reuni invitadonan den un ambiente agradabel dedica na arte, investigacion y herencia cultural di Aruba.
Arkeologo Harold Kelly, kende actualmente ta encarga cu e guia diario di MANA, a duna tur invitado un caluroso bonbini. Durante palabra, Kelly a comparti brevemente su experiencia di colaboracion cu Bernadette van der Klooster, un proceso cu finalmente a resulta den e exposicion special aki.
Prome Minister Mike Eman, kende tambe ta encarga cu Cultura, a tuma parti den e ceremonia. Durante e apertura, el a comparti un mensahe special cu a inclui na e prome pagina di e buki di e exposicion. E mensahe, lesa pa esnan presente y cu su firma, Prome Minister a declara oficialmente habri e exposicion.
Despues di e ceremonia formal, artista Bernadette van der Klooster a presenta un breve Artist Talk, caminda ela a comparti mas informacion tocante e investigacion y inspiracion tras di su trabou. E anochi a continua cu un momento social riba e terras di dak di MANA, caminda invitadonan a disfruta di un brindis y pasa boca.
E exposicion SITE–SIDE–SIGHT WALKS ta un proyecto cu combina investigacion cientifico cu expresion artistico, enfoca riba e pinturanan riba baranca indigena di Aruba. Den colaboracion cu arkeologo Harold Kelly di MANA, Van der Klooster a bishita diferente sitio arqueologico di e pinturanan y a traduci su investigacion den obhetonan di glas, instalacionnan artistico, reflexionnan textual y documentario audiovisual.
E exposicion lo keda disponibel na Museo Arqueologico Nacional Aruba te final di 2026, brindando diferente oportunidad pa publico conoce mas di cerca e conexion entre arte, historia y patrimonio cultural di Aruba.
Como parti di e programa, artista Bernadette van der Klooster lo ta presente dia 18 di maart, durante celebracion di 50 aña di Himno y Bandera di Aruba, pa duna un Artist Talk pa publico entre 10’or di mainta te 3’or di merdia.
