Dialuna mainta Prome Minister mr. Mike Eman, a asisti na e presentacion musical impresionante di Leerorkest, cu a tuma luga diamars 10 di juni for di 8:30 pa 11:30 di mainta na Renaissance Convention Center.
Durante e evento, un total di 560 mucha di diferente scol basico a subi podium formando orkesta pa klas 3, 4, 5 y 6, mientras cu 60 mucha di e After School Orkest a completa e presentacion. Tur invitado, incluso Prome Minister, a keda sumamente impresiona cu e talento y dedicacion cu e muchanan a demostra riba instrumentonan manera violin, cello, percusion, y instrumentonan di brasa manera horn y trompet.
E culminacion di e evento tabata un presentacion musical di tres cancion, cu e ultimo cancion cu a inclui un presentacion en bibo di Aruba su gran leyenda, Ataniro.
Leerorkest Aruba a inicia na 2019 como un proyecto socio-comunitario, cu sosten financiero parcial di Leerorkest Hulanda, cu ta haya subsidio di Ministerio di Husticia di Hulanda y ta comparti esey cu Aruba.
Premier Eman a enfatisa su admiracion pa e esfuerso y dedicacion di e muchanan y nan maestro(a), y a expresa su felicidad pa wak un programa cu ta haci realidad un desaroyo cultural y educativo integral pa e futuro di Aruba.
E muchanan a traha duro tur aña escolar pa desaroya nan habilidad musical, y e resultado ta un testimonio di kico ta posibel ora nos duna oportunidadnan igual pa tur mucha.
