Durante e dia di apertura di e competencia Aruba Hi-Winds 2025, Premier mr. Mike Eman hunto cu Minister di Deporte, mr. Gerlien Croes y Minister di Turismo mr. Wendrick Cicilia, a dedica oficialmente e beach di Fisherman’s Hut como “ Sarah-Quita Beach”, den honor di e campeon mundial di windsurf mas celebra di Aruba, Sarah-Quita Offringa.
Durante un ceremonia emocional, mey mey di deportistanan, fanatico, oficialnan y comunidad Arubano en general, Premier Eman a rindi homenahe na e logro deportivo extraordinario y impresionante di Offringa y su legado duradero como un modelo pa Aruba y pa mundo.
“Awe nos ta celebra mas cu solamente un nomber pa un beach, nos ta celebra un legado,” Prome Minister Eman a bisa. “Sarah-Quita tabata apenas tres aña ora cu el a subi riba un tabla di surf pa prome biaha. For di e momento ey, e biento di Aruba a hib’e den un biahe mundial.”
Prome Minister a reconoce e papel importante di e famia di Sarah-Quita den su trayectoria, incluyendo su mama Esther, ruman Quincy, y tata Ruud Offringa d.f.m.
“Ruud tabata semper na su banda, for di e prome rafaga te cu e victoria mas grandi. Apesar cu e no tey cu nos mas, awe e tin un sonrisa den shelo. Su espirito, mescos cu e biento cu Sarah-Quita ta surf cu ne, ta semper presente,”Premier Eman a agrega.
E ceremonia tabata parti di e apertura di Aruba Hi-Winds 2025 y a tuma luga na un di e areanan cu mas ta destaca e deporte di Kitesurf y Windsurf, esta Fisherman’s Hut. E decision di Gobierno di Aruba pa duna e beach aki e nomber di Sarah-Quita ta refleha e gran admiracion cu e pueblo di Aruba tin pa su logro y su caracter.
“Sarah-Quita no ta solamente un campeon mundial. E ta e personificacion di dignidad, forsa y humildad, loke ta representa e miho di loke ta significa pa ta Arubiano,” Premier Eman a continua. “Awe e playa aki tin su nomber, pa e generacionnan di futuro sa: for di aki, grandesa por nace.”
E proposicion pa e nomber a ricibi aprobacion di Conseho di Minister y a manda esaki na Comision di Nombramento di Caya. Esaki ta un di e honornan mas halto otorga na un deportista Arubano na bida.
Premier Eman a finalisa su discurso cu un mensahe pa hubentud Arubano:
“Laga Sarah-Quita Beach sirbi como recordatorio cu bo soño por cuminsa aki mes riba nos costa, bao nos shelo y cu curashi y caracter, por yega tur caminda den mundo.”
