Locual hende ta papia ta revela locual tin den nan curason, pasobra locual bo curason ta yen di dje, esey ta sali for di bo boca, sea ta bon of ta malo.
Ora nos tende un hende ta papia negativo constantemente, ta papia ofensa, ta saca mentira, ta biba den pasado di otro, esey ta nifica cu su curason, ta yen di cosnan morto, un curason herida, un curason amarga, y E unico cu por cura e curason ey ta e palabra y presencia di Dios.
Pasco ta un fiesta di amor, berdad, obediencia y mas cu tur cos pas.
Pa nos prepara pa nos Pasco caminda nos ta recorda nacemento di nos Rey Cristo, aunke tin discucion tocante fecha , pero e evidencia di Su Nacemento ta hopi grandi pa tur esnan cu ta kere den dj’E.
Tambe pa nos tur tene cuenta cune cu Beibel no ta papia di e fecha di nacemento ni tampoco e fecha di morto di Cristo Hesus, pero nos tin evidencia cu ta keda pa semper, aunke cuanto hende a purba bira e historia, pa haci manera ta nan sa mihor, Su Nacemento, Su Bida , Su Morto y Su Resureccion tey keto bay den nos curason y tur e pruebanan ta existi.
Y di ningun otro ta existi solamente di Cristo Hesus, pasobra ta E so a resucita y su graf ta bashi.
Nos mester samina nos curason y pone na ordo cu e palabra di Dios.
Nos mester biba cu e berdad.
Nos mester pordona otro di curason.
Nos mester stop di insulta otro.
Nos mester stima otro.
Nos mester biba bon cu otro.
Nos mester busca pa sa Dios su plan pa nos bida.
Pa nos haci tur e cosnan aki nos curason mester ta na lugar, pasobra e palabra di Dios ta bisa den Mateo 12: 34 -35.Pasobra for di abundancia di curason boca ta papia.E bon hende for di su bon teseoro, ta saca loke ta bon,y e mal hende for di su mal tesoro ta saca loke ta malo.
Laga nos bishita nos amigonan y famia, cu un curason habri, cu goso, no cu buracheria y parandiamento, pasobra ningun hende no tin mester di droga of bebe pa celebra Pasco.
Ta cada un di nos mester por recorda den nos curason locual Pasco ta nifica pa nos.
Nos no por celebra algo cu nos curason ta leu for di dje, ta imposibel celebra algo cu bo curason no ta desea, pa hopi tempo hende a biba cu Pasco ta tempo di demostra otro kico nos tin y un temporada pa competi ken a verf cas mas bunita, ken tin e lusnan di mas bunita, ken tin e ham di mas grandi, of ken tin mas alcohol den cas.
Pero a yega tempo pa nos realisa, cu mester dedica e miho Alabansa na nos Rey, e mihor cantica pa su Gloria,y esey , por sali solamente for di un curason cu ta anhela presencia di Dios.
Nos panjanan por ta bunita, cas bunita, auto bunita, hopi cuminda, pero conta cu nos curason. Conta cu nos relacion un cu otro, conta cu e matrimonio y conta cu e famia, conta cu e yuinan.
Corda bon den un matrimonio of famia, no por ta posibel cu hende ta duna otro bon pasco via App, mientras cu nan ta biba hunto cu otro, e bida artificial ey no ta agrada Dios, nos tur mester trata otro cu un curason berdadero pasobra nos tin di corda cu ta un curason nos tin.
Prepara bo pasco den un curason sincero.
Sinceramente, Pastor Marcel Balootje
