Dialuna mainta Parlamento di Aruba a tene un reunion cera cu director di e Crisis Management Office (CMO), señor Rino Hermans, hunto cu otro miembronan di su delegacion. Durante e reunion aki, Parlamento a keda informa detayadamente riba e situacion regional actual y e nivel di preparacion di Aruba pa diferente eventualidad.
Diasabra di siman pasa, na consecuencia di e detencion di Nicolas Maduro na Venezuela, Parlamento a tuma e decision pa schors nan reces di e dianan di fiesta y a yama inmediatamente un seniorenconvent.
Durante e encuentro ey, Prome Minister mr. Mike Eman y Minister di Husticia drs. Arthur Dowers a duna Parlamento un informacion amplio riba e situacion actual, e posibel desaroyo, y kico por ta e impacto pa Pais Aruba.
Manera ta conoci, e situacion te aworaki ta mustra señalnan di normalisacion. No obstante, Parlamento ta consiente cu den mesun contexto tin indicacionnan internacional, manera declaracionnan di presidente di Merca, Donald Trump, cu ta pone enfasis riba un transicion pasifico, pero cu no ta exclui otro scenario si e proceso no sigui e rumbo desea. Esaki ta haci cu Parlamento ta wak e situacion cu seriedad y responsabilidad.
Pa Parlamento, ta di gran importancia pa ta bon informa riba e grado di preparacion di e departamentonan cu tin un rol clave den maneho di crisis, particularmente CMO, cu ta encarga di coordinacion den caso di situacionnan extraordinario. Durante e reunion awemainta, CMO a presenta nan plannan, procedimento y e manera cu tur entidad relevante ta trahando hunto pa garantisa stabilidad, siguridad y coordinacion.
E mensahe principal di e reunion tabata pa duna siguransa cu e institucionnan di Pais Aruba ta alerta, ta monitoreando e desaroyonan di cerca y leu, y ta prepara pa atende cu diferente scenario si esaki ta necesario. Parlamento, hunto cu Conseho di Minister y e instancianan competente, ta asumi plenamente nan responsabilidad institucional.
Parlamento di Aruba kier reafirma na pueblo cu tur medida necesario ta na su luga pa proteha e bienestar di nos comunidad. Den cualkier circunstancia, Parlamento lo keda na altura di su rol pa atende, supervisa y sostene e institucionnan cu ta sirbi nos pais.
