WILLEMSTAD – Di 18 di juni te 23 di juni, presidente di Corte Supremo, señora mr. Dineke de
Groot, a haci un bishita di trabao na cinco di e seis islanan Caribense den Reino. Cada dos aña,
presidente di Corte Supremo ta bishita Caribe. E biaha aki, combersacionnan tocante e tema
“Acceso na derecho” tawata para central durante su bishita. Tanto pa e islanan como pa
Hulanda europeo, esaki ta un topico importante, pasobra pa proteccion huridico efectivo di
hende y organisacionnan e acceso na derecho mester ta garantisa.
De Groot ta presidente di Corte Supremo for di 1 di november 2020. E ta e prome presidente
femenino for di e instauracion di Corte Supremo na 1838. Corte Supremo ta e hues di casacion,
tanto na Hulanda como na e paisnan y islanan di Reino. Na casacion no ta bolbe trata e
contenido di casonan, sino ta verifica si a aplica derecho y e reglanan di proceso debidamente.
Durante su biahe, De Groot a keda acompaña dor di e presidente di Corte Comun di Husticia,
señor mr. Mauritsz de Kort.
Saba
De Groot y De Kort a cuminsa nan biahe na Saba. Aki, nan a ser acoge dor di señor mr. Gerald
Simmons – de Jong (hues suplente). De Groot a cuminsa su biahe bishitando e futuro sede di
Corte Comun na Saba. Pa medio di e sede nobo aki, Corte ta spera di mehora e acceso na
derecho. Na Saba, De Groot a papia cu señor Jonathan Johnson, Gezaghebber di Saba, señor
Wingrove Baker, hefe di cuerpo policial na Saba, señora Lucrecia Paulina, coordinador di
trabaonan social y señora Alida Heilbron, den su capacidad di presidente di Saba Business
Association.
“E trabao di trahadonan social na Saba ta duro. E acceso na derecho y na servicionan huridico
di calidad no semper ta bon. Esey ta significa cu como trahado social riba e islanan chikito den
hopi caso abo mes hunto cu gobernacion local tin cu haya un solucion. Ta hopi bon cu Corte
Comun ta bay habri un sede na Saba. Si por ekipa e sede aki cu un loket di referencia, y si talbes
por busca un manera di conecta cu otro servicionan, manera Loket Huridico, Ombudsman y
Colegio pa Derechonan Humano, lo ta ideal”, esaki segun Lucrecia Paulina.
Sint Eustatius
E siguiente isla tawata Sint Eustatius. Aki, De Groot y De Kort a ser acoge dor di señora mr.
Monique Brown (hues suplente). Na Sint Eustatius, De Groot a cera conoci cu señora Alida
Francis, Secretario di Gobierno. E topico di combersacion entre Francis y De Groot akinan
tambe tawata mehora di acceso na derecho y e papel importante di Corte Supremo pa e islanan
den e marco di uniformidad y concordancia. Na Sint Eustatius tambe, De Groot y De Kort a
bishita e futuro sede nobo di Corte.
Segun Mauritsz de Kort “ta bon pa para keto na e retonan extraordinario di nos islanan ruman
mas chikito. E acceso na derecho y e acceso na servicionan huridico ta ehemplonan di esaki.
Comunidadnan mas chikito manera Saba y Sint Eustatius ta sumamente apto pa iniciativanan y
pilotnan como hurisdiccion di bario. Ami ta partidario di traha na midi riba e diferente islanan,
den e buskeda pa mehora e acceso na derecho”.
Sint Maarten
For di Sint Eustatius De Groot y De Kort a bula bay Sint Maarten. Aki, De Groot a cera conoci cu
señora Anna Richardson, Ministro di Husticia di pais Sint Maarten. De Groot y Richardson
entre otro a papia di e papel di Corte Supremo den Reino y e diferente desaroyonan y retonan
na Sint Maarten, manera e necesidad di desaroya un Ordenanza Nacional di Abogacia nobo y e
mehora di e acceso na comision di keho di polis. Durante su bishita, De Groot tambe a cera
conoci cu Hieke Buist, fiscal mayor di Sint Maarten y cu Walter Kupers, fiscal mayor di BES.
Acompaña dor di De Kort, De Groot a bishita prizon di Sint Maarten tambe, caminda nan a
papia cu e director, señor Steven Carty. Señor Carty a duna un imagen aclarativo di e situacion
actual di e prizon Pointe Blanche y e pasonan cu e ta tumando pa haci e resocialisacion di
presonan posibel, a pesar di e scarsedad di recursonan.
E bishita di De Groot na Sint Maarten a coincidi cu e Consulta Hudicial di Cuater Pais (Justitieel
Vierlandenoverleg, JVO). Esaki ta un deliberacion caminda e Ministronan di Husticia di Aruba,
Corsou, Sint Maarten y Hulanda ta reuni pa sincronisa y papia tocante di diferente topico den e
area hudicial. Esaki tawata un oportunidad ideal pa De Groot cera conoci tambe cu señor
Shalten Hato, Ministro di Husticia di Corsou y cu señor Rocco Tjon, Ministro di Husticia di
Aruba. De Groot por a papia cu tur ministro di e paisnan, entre nan tambe señor Franc
Weerwind, tocante e posibilidadnan di tanto mehora acceso na derecho como enfatisa e
importancia di asistencia huridico. A informa Minister Tjon cu na 2021 De Groot a bishita
Aruba, cu e biaha aki no a logra pa motibonan logistico y cu siguiente biaha gustosamente e lo
kier bini Aruba atrobe.
Naturalmente, un bishita na Courthouse di Sint Maarten no por a falta. Durante e bishita aki,
De Groot a papia no solamente cu huesnan y personal huridico, sino tambe ela presencia un
sesion di “hurricane preparation” cu tur coleganan di Courthouse. Di doño di curpa mes ela
haya sa cuanto impacto horcan por tin, no solamente pa hende, pero tambe pa e continuidad di
hurisdiccion.
Corsou y Boneiro
Di transito pa bay Boneiro, na Cas di Corte De Groot a cera conoci cu e huesnan di Corsou,
mientras cu e huesnan di Aruba a participa den e sesion aki pa medio di un coneccion di video.
Durante e sesion aki a delibera si tin mas manera cu Corte Supremo por apoya y facilita Corte
Comun ainda mas. Anteriormente, Corte Supremo a pone su biblioteca huridico digital na
disposicion di Corte Comun.
Na su yegada na Boneiro, De Groot a cera conoci cu señor Nolly Oleana y señor Jan Helmond.
Oleana ta e recien nombra Gezaghebber suplente di Boneiro y Helmond ta Representante di
Reino suplente. Cu Oleana entre otro a papia tocante di e posibilidad di establece un corte
hubenil pa Boneiro. Despues di un bishita na e oficina di Ministerio Publico y un recorido bao
di guia di hues suplente mr. Chris Frans den prizon JICN, a conclui e bishita na Corte di
Boneiro caminda a tuma luga un sesion cu abogadonan local di Boneiro, e hues di Boneiro y
sobra coleganan di Corte.
Naturaleza & Cultura
De Groot no solamente a cera conoci cu figuranan clave riba e islanan. Tambe a probecha e
ocasion pa siña conoci e naturaleza y cultura di e islanan. Asina por ehemplo, entre tur e
actividadnan cu e tawata tin, De Groot a tuma tempo pa subi Mount Scenery. Na Boneiro y Sint
Eustatius ela participa den un recorido riba e islanan, cu na Sint Eustatius tawata inclui un
bishita special na e Historical Foundation Museum. Y na Sint Maarten, De Groot y De Kort a
bishita e Sint Maarten National Heritage Museum.
“Pa ami como presidente, un bishita na e islanan ta brindami e oportunidad di scucha e locual
cu ta pasando, pa duna splicacion tocante e papel di Corte Supremo como Hues di Reino, y pa
intercambia idea cu interlocutornan tocante di kico ta bayendo bon y kico por mehora, por
ehemplo e acceso na derecho pa e poblacion di e islanan, e topico central di e bishita aki. Ora cu
mi papia cu hendenan riba e islanan cu no ta envolvi cu husticia, mi sa tende cu basta
frecuencia cu nan ta haya importante pa por acudi na Corte Supremo cu un caso tocante
asuntonan di unidad huridico, desaroyo di derecho y proteccion huridico, pero cu ta balora
hurisdiccion riba e islanan positivamente y cu esaki frecuentemente ta suficiente. Den hopi di e
combersacionnan ta papia abiertamente di posibel dilemanan y expectativanan, como por
ehemplo den ki medida por tene cuenta optimamente cu e situacion local di e islanan na
momento di interpreta y aplica e normanan huridico. Naturalmente no ta papia di casonan
concreto. Tawata tin hopi combersacion cu tambe a trata di con den practica ta experencia
hurisdiccion y – mas den termino general – e visibilidad di husticia. Ami a experencia e bishita
aki como hopi util y agradabel, entre otro e componente di naturaleza y cultura. E subida di
Mount Scenery a termina banda di e piedra cu inscripcion di e alturanan di Mount Scenery (887
m) y Vaalserberg (332 m). Nos ta un Reino.”, Dineke de Groot a conclui.
