Diamars awor 25 januari pueblo di Aruba ta recorda y celebra e fecha natal di nos libertador Betico Croes. Tur aña nos ta recorda su nacemento como reflexion cu e lucha pa conserva nos autonomia y bienestar di nos pais y di nos hendenan ta den nos man. Y sigur pa Aruba por keda progresa y prospera ta exigi pa pueblo ta uni den mesun causa cu ta Aruba y esaki cada aña nos libertador Betico Croes ta brinda nos e oportunidad di reflexiona y trece cambio na bienestar di nos hendenan riba nos dushi isla Aruba.
Nos Libertador Betico Croes tabata simbolo di union
Pa por a logra nos Status Aparte e tarea di mas difícil tabata di uni un pueblo completamente dividi pa politica y politiconan. Y un biaha mas pueblo por experiencia e division aki y cu tur consecuencia pa stabilidad di nos pais. Nos Libertador Betico Croes a percura pa uni y e pueblo aki, y unda cu e uniin aki a ser expresa den nos Himno y Bandera como e simbolonan di union pero sigur di nacemento di Aruba como pais. Nos pueblo tabata orguyoso y a uni c’un causa pa Aruba ta liber y asina nos a logra nos Status Aparte cu hopi lucha y sacrificio.
Nos como pueblo tin di uni pa surpasa e retonan di COVID019 y financiero di pais Aruba
Aruba a bin ta pasando den temponan difícil financieramente prome cu COVID-19 y cu tabata afecta tur sector y sigur e area social di nos pais. E pandemia di COVID-19 a haci nos situacion mas vulnerabel ainda. Pero semper nos pueblo di Aruba a sa di saca cabes di tur adversidad y esaki no ta bai ta diferente, pero e ta exigi hopi lucha y sacrificio y union di nos pueblo y cu e unico meta pa percura pa Aruba un biaha mas por sali dilanti. Nos como pais mester ta consciente cu nos no por keda haci mesun cos y pensando cu lo haya otro resultado. Y sigur nos como pueblo mester ta mas consciente ki daño falta di decision politico a haci na nos pais Aruba. A yega momento pa pueblo di Aruba ta critico y sigur obhetivo p’asina nos pais den futuro por ta para riba su pianan y ta prepara pa enfrenta tur reto y adversidad y asina por brinda nos siguiente generacionnan un mihor futuro.
Y pa termina mi ta desea e pueblo di Aruba un bunita celebracion di dia di nos Libertador Betico Croes y no lubida su dicho: NO TIN LUCHA SIN SACRIFICIO, NO TIN SACRIFICIO SIN LUCHA.
