Diaranson ultimo mainta 9am Parlamento a inicia cu e Reunion Publico pa trata e ley di minimumuurloon. Un Ley cu Shailiny Tromp- Lee a traha incansablemente riba dije desde 2018. Den Pandemia (2020) mester a frena e trabounan. Sinembargo huntu cu ex minister di Labor Glenbert Croes nan a percura pa e ley aki keda cla. Desde november 2024 dicho Ley a yega Parlamento y tabata cla pa wordo trata. Lamentablemente Geoffrey Wever di partido Raiz e tempo ey den gobierno no tabata pro e ley y e Presidente ‘zwak’ di e tempo ey Kamperveen no a yama e reunion. Desde 8 di januari 2025 Gerlien Croes tabata Presidente di Parlamento kende tampoco a preocupa su mes cu e homber chikito y a laga e Ley aki den lachi. Partido Futuro den eleccion y den debate a expresa cu nan ta contra cualkier aumento di salario minimo pa e homber chikito. Despues di hopi insistencia di MEP unda a manda varios carta pa presiona Presidente(nan) di Parlamento pa yama e Reunion Publico pa trata e ley di ‘minimumuurloon’ finalmente diaranson 27 di Augustus esaki a wordo yama.
Shailiny Tromp -Lee a duna un splicacion amplio den Parlamento
Shailiny Tromp Lee a sali duna un splicacion hopi cla riba e ley di tur e proceso di reunionnan y preparacion pa por a yega akinan. Actualmente un persona cu ta traha 40 ora pa siman of 42,44 of 45 ora pa siman ta cobra e mesun salario minimo di Afl. 1.986,20. Esaki no ta husto y ta discriminatorio. Cu e cambio riba e ‘minimumuurloon’ un hende cu traha 40 ora pa siman lo cuminsa cobra Afl.2.007,05 pa luna, un persona cu traha 42 ora pa siman lo cobra Afl. 2.107,40 pa luna. Un persona cu traha 44 ora pa siman lo cobra Afl. 2.207,75 y un persona cu ta traha 45 ora pa siman lo cobra Afl.2.257,93. Pues por nota diferencianan y adelantonan substancial y husto alrespecto esaki. Tanto rapport di SER y conseho di Raad van Advies ta sumamente positivo alrespecto e cambionan aki. Nos mester felicita Shailiny Tromp Lee, Glenbert Croes, Gabinete Wever Croes 2 y tur cu a yuda pa presenta e ley aki.
Marlon Sneek a ‘schors’ reunion pa AVP bay lesa e ley
Durante e reunion Shailiny Tromp -Lee a sali splica di e ley y tanto Parlamentarionan Edgard Vrolijk, Dangui Oduber y Endy Croes a hiba nan discurso amplio riba dicho ley splicando e beneficio di esaki directamente na 6.600 persona cu ta cobrando ‘minimumloon’ di 54.000 persona cu ta trahando na Aruba. Por a tuma nota mesora cu Parlamentarionan di AVP no a lesa e ley y nan no a skirbi nomber pa por a elabora. Heyliger di AVP a tira un para y a core skirbi nomber y a papia bobedad pa net 3 minuut. Tur esakinan a desemboca cu Marlon Sneek a rabia y pa scapa cara di Parlamentarionan ‘zwak’ di AVP a schors e reunion riba peticion di AVP pa asina duna nan chens pa bay lesa e ley y traha riba nan speech. MEP mesora a manda carta pa presidente di Parlamento exigiendo Sneek pa yama e reunion bek e siman aki mes. Na final di atardi Sneek a reacciona y a yama e reunion bek pa Dialuna awor 1 di september pa 9am di mainta. Ta lamenta cu desde 8 di januari cu Parlamentarionan di AVP a huramenta y e ley aki ta den Parlamento nan no a tuma tempo pa lese y prepara nan mes. E homber chikito ta keda sufri na man di AVP.
