Tabata riba dia 9 di februari 1971 cu e hoben politico Arubano Betico Croes dfm a funda su propio partido y a dun’e e nomber di Movimiento Electoral di Pueblo, MEP.
Den e eleccion di Eilandsraad cu a tuma lugar 3 luna despues e partido aki a obtene 7 asiento, pero no a logra forma parti di gobierno di Aruba y a bay den oposicion. Sinembargo, desde cu e partido a keda funda na aña 1971, semper MEP a sa di mantene un minimo di 7 asiento den tur eleccion.
E vision y meta di nos prome lider y libertador Betico Croes, tabata pa uni tanto su pueblo y gobernantenan sin importa rasa, color, religion y ideologia politico. Sin duda cu e union aki cu a crea un forsa enorme, tabata determinante pa por a realisa e deseo di e pueblo Arubano, esta nos Status Aparte.
Nos prestigioso partido MEP durante 51 aña a sa di conoce 3 lider den persona di sr. François ‘Betico’ Croes, sr. Nelson Oduber y sra. Evelyna Wever-Croes. Tres persona cu un vision, amor y determinacion pa pone nos Aruba para fuerte den temponan dificil.
Union ta haci forsa y esaki a keda demostra 51 aña pasa cu nos movimiento, esta Moviento Electoral di Pueblo. E union, forsa y grandesa aki awe ainda ta bibo den cada hogar na Aruba, pasobra nos tin e libertad di tin nos simbolonan nacional, e libertad pa participa, traha y reuni den comunidad sin ningun strobacion. MEP ta para na defensa di tur ciudadano, pa nan dignidad, libertad y pa democracia real.
Como presidente y orguyoso miembro di e famia di nos prestigioso partido Movimiento Electoral di Pueblo, MEP, mi ta extende mi palabranan di felicitacion cu e di 51 aniversario di MEP na nos honorario lider sr. Nelson Oduber, nos lider actual sra. Evelyna Wever-Croes, nos candidatonan, directivanan, comisionnan, lidernan di bario, votadornan, sostenedornan y pueblo di Aruba.
MEP ta sigui avansa den union y forsa na bienestar di nos dushi Aruba.
