Riba dialuna 21 di oktober Aruba ta ricibi un bishita oficial di e presidente di Republica di Surinam, Su Excelencia Chandrikapersad Santokhi, riba invitacion di Minister President di Aruba.
Presidente Santokhi ta acompaña door di su señora esposa First Lady Mellisa Santokhi Seenacherry y e Minister di Asuntonan di Exterior, International Business y Cooperacion Internacional Su Excelencia Albert Ramdin y su delegacion consistiendo di Consul General sra. Christa Zuiverloon, y demas funcionarionan di e delagacion di gobierno Surinam.
Durante di e estadia di un dia na Aruba lo haci un bishita oficial na Gobernador di Aruba Su Excelencia sr. Alfonso Boekhoudt, despues lo bishita Parlamento di Aruba, Bestuurskantoor, Royal Aruba Aloe sigui pa un business mixer organisa pa Departamento di Asunto Economico conhuntamente cu Departamento di Relacionnan Exterior y un diner pa clausura e bishita.
First Lady sra. Mellisa Santokhi-Seenacherry den compania di sra. Hanneke Boekhoudt Koetse, esposa di Gobernador di Aruba, lo haci un bishita special na Educampus unda lo hiba un charla cu e studiantenan encuanto salud mental bou di muchanan y hobennan.
Di algun luna caba gobierno di Aruba ta den full swing cu e preparacion pa e bishita oficial di e Presidente di Republica di Surinam. Durante di varios encuentro den exterior entre e mandatarionan di ambos nacion a reconfirma nan entusiasmo pa cu un bishita oficial na Aruba.
Gobierno di Aruba di e forma aki ta reforsa e bon relacion amistoso, diplomatico y comercial entre Aruba y Republica di Surinam
