PARADERA – , 25 augustus 2021,- Diaranson venidero dia 1 di september, Fundacion Educador Consciente Aruba (FECA) ta organisa un tayer pa mayornan cu e tema: E Peuter y su Kier.
E tayer di 1 september na Maggy’s Oranjestad tocante e Peuter y su Kier ta siňa mayornan con
pa anda cu e reto ora e baby bira un mucha cu tin su mesun kier (Terrible Two’s and Three’s) na un manera positivo cu tips practico.
E cambio di baby pa peuter ta encera cu e mucha ta cuminsa bisa “no” ora e no kier algo, ora e mes kier haci hopi cos y door di tantrums ora e no haya loke e kier. Aunke esaki ta algo normal, hopi mayor no sa bon con pa anda cu esaki, nan baby dushi a bira un “monster” cu su propio kier. Mayoria mayor ta bisa “no” cada rato y lo ripara cu esey no ta yuda. Zundra, spanta of klap
mucha, ta juist destrui e conexion entre mayor cu yui pasobra e no ta laga e yui sinti ‘safe’. Of ta duna e mucha locual e kier of ten’e keto cu smartphone.
Niun di e metodonan aki ta mucho efectivo y ta laga hopi mayor ainda mas cansa y frustra.
Den e workshop Peuter y su Kier lo siña maneranan mas eficaz con pa anda cu un baby cu ta birando mas grandi. Maneranan cu lo aporta na un desaroyo positivo di un yiu. Algun tayer cu a wordo duna den pasado ta Encurasha un Mucha, Disciplina y Responsabilidad, Keep Your Cool, y Siňa bo Yui Respet y Wordo Respet. Tur a yuda mayornan, voogdnan, wela y welonan,
y verzorgers cu contestanan riba e pregunta con pa educa nos muchanan na un manera cu nan
lo bira adultonan mentalmente balansa.
Fundacion Educador Consciente Aruba a wordo lansa na november 2019 y tin como meta pa contribui na un desaroyo social emocional saludabel di nos muchanan ofreciendo conocemento y practica di Disciplina Consciente (Conscious Discipline) na tur mayor, educador,y comunidad en general.
E tayer di E Peuter y su Kier ta tuma lugar na Maggy’s Caya Grandi, diaranson 1 september di 7pm -9pm pa solamente Afl 25,-. Pa registra por whatsapp 560-0679 of mail fecaruba@gmail.com
Pa mas informacion por bishita e Facebook page: www.fb.com/educadorconscientearuba
