Profesor internacional y orador prinsipal Prof. Govert Buijs a expresa su aprecio pa e compromiso di Aruba pa fortalece e Bon Comun durante su participacion na e Conferencia di Bon Comun recientemente teni.
Prof. Buijs — profesor di Filosofia Politico y Filosofia di Economia na Universidat di Amsterdam — tambe ta co-autor, hunto cu ex-Promer Minister di Hulanda, dr. mr. Jan Peter Balkenende, di e buki Capitalism Reconnected, cu ta explora e rol di balornan, responsabilidat y cohesion social den sistema economico moderno.
Durante su bishita, el a bisa cu su prome impresion di Aruba tabata marca pa e amabilidat di su hendenan y e gran variedad di iniciativa social pa sirbi comunidad. Especialmente el a keda impresioná cu e exibicion di organisacionan lokal, na e Common Good Expo, pa duna yudansa na hendenan mayor, personanan cu limitacion, hendenan cu adiccion, proyectonan ambiental y iniciativa di voluntariado.
“Mi a keda hopi impresioná cu loke ta worde haci caba na Aruba pa contribui na realizacion di e Bon Comun,” segun Prof. Buijs.
E Bon Comun como un practica continuo
Prof. Buijs a enfatisa cu e Bon Comun no ta un concepto statico, sino un esfuerzo continuo di comunidad cu ta rekeri atencion iyparticipacion colectivo.
El a diferensia entre biennan priva, biennan publico y loke el yama “biennan relacional” — actividadnan comparti y cooperacion cu ta fortalece lasonan social — y a indica cu esakinan ta esencial pa sociedad civil y mester wordo stimula activamente.
El a expresa aprecio pa e liderasgo di Promer Minister Mike Eman den promocion di e vision aki y den estimulacion di dialogo publico riba e tema.
“E Bon Comun ta algo cu bo mester hasi hunto constantemente — mester wordo stimula y reflexiona riba dje. Esaki ta hopi positivo den e iniciativa aki y den e enfoke fuerte di Promer Minister Mike Eman.”
Relevancia internacional
Prof. Buijs a subraya e importancia mas amplio di e enfoque di Aruba y a bisa cu e Bon Comun ta bou presion den hopi sociedadnan. Segun prof Buijs, liderazgo basa riba un vision di Common Good ta mucho poco den mundo, mientras cu e ta hopi necesario.
“Na Hulanda nos por usa un lider cu un vision fuerte asina. E idea cu Aruba por ta un strea di guia — no solamente pa Hulanda sino pa otro parti di mundo — ta hopi atractivo.”
Siguiendo e conversacion y Dialogo
E Conferencia di Bon Comun a reuni academico, organizacionnan social y lidernan di comunidad pa explora maneho y practicanan pa fortalece cohesion social, sostenibilidad y responsabilidat comparti.
Promer Minister mr. Mike Eman na final di e confrencia a enfatiisa cu Gobierno di Aruba ta keda comprometí na avansa dialogo y iniciativa cu ta fortalece bienestar colectivo y participacion activo den construccion di un sociedad guia pa e Bon Comun.
