Profesor Earney Lasten PhD MA MSC: Pakiko gobierno di aruba ta facilita nos estudiantenan un prestamo pa continua nan estudio mas avanza pa nan termina nan estudio cu éxito cu e titulo di maestro of doctorado?

Educacion avanza ta un guía na nos pueblo y ta e manera mas adecuado pa nos hendenan crece cu un conocemento mas amplio. Educacion ta e yabi pa un desaroyo sano den nos mes hendenan.

Gobierno di Aruba ta brinda nos studiantenan tur aña un préstamo cu e oportunidad pa continua nan estudio den exterior. Ora nos studiantenan termina nan estudio cu éxito, Gobierno ta exigi pa nan devolve e placa présta. 

Tin un grupo di studiantenan cu ta bin na remarca pa risibi di gobierno un préstamo pa sigui studia den exterior y na Aruba mes. E pregunta principal ta, si Gobierno ta hasi un inventirasacion pa sa cuanto y ki nivel di un profesional tin obtenible den sector priva y den sector publico. Kiko ta bal si nos studiantenan ta haya oportunidad cu medio di un préstamo di gobierno pa continua cu nan estudio, pero na mes momento no sa si ora nan termina nan estudio cu éxito, si tin trabow pa nan aki na Aruba?

Tin un grupo di profesional cu no por haya trabow den e ramo cu nan a studia y tambe no ta risibi e nivel di salario cu ta cuadra cu nan estudio!  Profesionalnan ta keda cu lomba pa muraya, buscando pa un trabow, maske cu tal trabow no ta cuadra cu loke nan a studia. 

E pregunta ta; Kiko mester sosode, Kiko mester pasa, pa un profesional cu a termina su estudio cu e éxito después varios aña, ta bolbe Aruba, cu yen di energía pa brinda Aruba su experticio profesional, pa después mester scucha cu e estudio cu e studiante a promove, no tin vacatura pe. Ora scucha esaki, e studiante ta drenta un depresión, ta puntra su mes, pakiko mi a studia, pakiko mi no por haya un trabow den mi ramo cu mi a studia? 

E situación aki ta alarmante pa nos studiantenan y nos por bisa cu esaki ta baha e interés pa studiantenan ta desea di sigui nan estudio mas avanza. 

Nos hendenan naci na Aruba, ta desea semper pa ora nan termina nan estudio, bin Aruba bek pa duna nan aporte pa e continuación di un desaroyo sano pa Aruba su futuro. Pesey ta importante y necesario pa Gobierno di Aruba, hasi posibel cu esnan cu a termina nan estudio, por haya oportunidad pa drenta e mercado laboral cu e estudio profesional cunan a termina.

Nos ta di opinión cu ta necesario pa lanta un fundación pa nos profesionalnan pa risibi un voz den nos comunidad cu e meta pa nos por haya oído cerca esnan den sector publico y sector priva.