E enemigo no por stroba ni kita e bendicion cu Dios ta manda pa un persona, pero locual e por haci ta trece tardansa.
Pesey e palabra di Dios ta siña nos lo siguiente:
Salmo 1-2-3 ta para scirbi:
Bendiciona ta e hende cu no ta cana den conseho di malbadonan.
Ni ta para den caminda di pecadornan.
Ni ta sinta riba stul di bofonadornan.
Esun cu tin horea scucha y esun cu tin wowo lesa e palabra di Dios, y wak bon cu ken bo ta cana, y cual ta e caminda cu hende ta hiba bo, pasobra si bo kier ta sabi, bo mester cana cu hende sabi.
Tene bon cuenta con bo ta cana pasobra e dianan ta malo.
Bijbel ta proba con diabel kier trece tardansa, pa asina purba stroba e contesta di oracion, cu Dios ta manda pa hende Daniel 10:12-13 : E ora ey e bisa mi, no tene miedo Daniel, pasobra for di prome dia cu bo a pone bo curason pa compronde esaki y pa humiya bo mes dilanti di bo Dios, bo palabranan a wordo tendi, y mi a bini como contesta riba bo palabranan.Ma e prins di e reino di Persia tabata strobami,binti un dia largo, y mira Miguel un di e prinsnan principal a bin yudami, pasobra mi a keda ayanan serca e reinan di Persia.
Ora Lot mester a sali for di Sodoma y Gommorra e enemigo a trece tardansa, pero e Angelnan a insisti serca Lot bisando: lanta tuma bo esposa y bo dos yui muhernan cu ta aki,pa boso no perece den e castigo di e stat. Ma lot a tarda , pesey e hombernan a gara su man y man di su esposa y man di su dos yui muhernan pasobra e compasion di Señor tabata riba dje y nan a hibe pafo y pone pafo di e stad. ( Genesis 19:15-16).
Pero awendia con nos por reprende y vence e spirito di tardansa?.
* Cana den e autoridad di Dios. (Lucas 10:19).
*Mantene un bida di oracion ( Marco (9;29 y Phil 4:6).
*Haci oracion den nomber di Cristo Hesus pa kibra maldicion y tardansa (Juan 14:13).
*Drenta den acuerdo di oracion cu un persona cu ta kere den Dios( Mateo 18:19).
*Stop di papia negativo y haci redo ( Proverbionan 18:21).
*Dios por kibra tur tardansa ( Hebreos 11:30).
*Duna na Señor. ( Lucas 6:38).
*Realisa cu Dios ta fiel pa completa locual E a start ( Salmo 92:2).
*Ehempel di murmuracion, tardansa y mal uso di lenga di hende nos ta lesa den Numeronan 14:27-33.
*Miriam a murmura contra di Moises y papia malo y a causa tardansa den henter e pueblo ( Numbernan 12:15 ).
Pesey nos mester tin e mente di Cristo,( Phil 2:5) y tambe mesun actitud di Cristo Hesus.
Bida largo ta den su man drechi, y rikesa y honor ta den su man robes, su camindanan ta camindanan agradabel y tur su berehenan ta pas.( Proverbionan 2:16-17).
Efesionan 6:10-11-12 ta recorda nos tur cu nos mester bisti e armadura completo di Dios, pa boso por para contra e trampanan di e diabel, Pasobra nos lucha no ta contra carni y sanger,sino contra e gobernantenan contra podernan, contra e forsanan mundial di scuridad di maldad den lugarnan celestial.
*Ora nos ta papia malo den nos hogar, y papia malo di nos mes hendenan di cas, nos ta habri porta di murmuracion y tardansa, pasobra esey no ta di Dios.
Haci oracion sin stop. Sea gradecido na Dios den tur cos.(Thesalonisensenan 2:17-18).
Sinceramente, Pastor Marcel Balootje.
