Durante un encuentro den Tweede Kamer der Staten-Generaal cu delegacion di Aruba, lider di fraccion Progressief Nederland, Jesse Klaver, a enfatisa e importancia di mantene dialogo y cooperacion activo entre e diferente paisnan den Reino Hulandes. E reunion cu Prome Minister mr. Mike Eman tabata centra riba futuro di Reino, cooperacion strategico y e vision pa desaroyo sostenibel y economia di conocemento den Aruba.
Progressief Nederland ta e movemento politico cu a surgi for di e fusion entre GroenLinks y PvdA, cu e meta di reuni e forsa progresista den Hulanda alrededor di tema social, sostenibilidad y cooperacion internacional. Segun Klaver, e relacion entre Aruba y Hulanda mester continua basa riba respeto mutuo y e conciencia cu tur pais den Reino ta comparti un historia y un responsabilidad comun.
“Nos ta separa door di un oceano, pero nos ta conecta door di un historia comparti. Ta importante cu nos sigui construyendo hunto rib’e futuro nobo di Reino,” Klaver a expresa despues di e reunion. Durante e encuentro, a dialoga riba diferente tema strategico, incluyendo cooperacion den area di conocemento, innovacion y e rol cu instituto manera TNO por hunga den futuro economico di Aruba. Klaver a expresa cu el a aprecia e vision comparti pa Prome Minister Mike Eman y a destaca su experiencia politico y direccion strategico. “E Prome Minister ta un homber cu un trayectoria hopi largo y cu un vision sumamente interesante. Mi ta contento cu el a comparti esaki cu nos awe,” Klaver a comenta.
Klaver tambe a enfatisa cu den Tweede Kamer tin hopi interes tocante e importancia di Reino Hulandes y e necesidad pa mira e paisnan den Caribe como partner igual den e mesun Reino. El a señala cu hopi biaha na Hulanda ta lubida cu Aruba no ta un pais stranhero, sino un parti integral di Reino. Segun Klaver, hopi logro positivo lo por alcansa den cooperacion entre Aruba y Hulanda y e tin confiansa cu ainda tin hopi oportunidad pa fortalece e relacionnan institucional y strategico den futuro.
E reunion forma parti di e serie di encuentro oficial cu delegacion di Aruba ta mantene durante bishita na Hulanda, enfoca riba fortalece relacionnan institucional, amplia cooperacion internacional y crea oportunidadnan nobo pa desaroyo economico y social den Aruba.
