Manera tur aña Horacio Oduber Hospital ta organisa e tan anhela pe muchanan
“Hospi Bondi Camp” cu ta yena di actividad pe yiunan y nieto di empleadonan.
Prome cu vakantie cuminsa ya caba e muchanan ta cuminsa puntra ki dia Hospi
Bondi Camp ta cuminsa y ki tur nan ta bay haci e aña aki. E aña aki ta di 31 aña cu
ta organisa Hospi Bondi Camp y pa prome biaha den historia e tin un duracion di
tres siman largo di actividad na luga di dos siman.
Director di HOH Jacco Vroegop ta splica cu un camp asina e no conoce na Hulanda
pero cu ta algo cu e ta aplaudi pa e creatividad y ambiente. “Di e manera aki
Hospital ta percura pa su trahadonan ta trankil ofreciendo un camp pa nan yiunan,
pa nan tin un luga leuk y safe pa laga nan yiu bay gosa durante vakantie. Mi ta hopi
orguyoso como director cu nos ta ofrece esaki y mi ta spera di por sigui cu Hospi
Bondi Camp pa hopi aña mas”, Vroegop ta conta. Un campamento asina ta exigi
hopi energia y mi ta gradici di curason henter e team, tur lider y asistent y esnan cu
a yuda organisa y prepara pa por haci esaki posibel. “Simannan di preparacion
caotico y druk pero cu hopi amor y pasion. Algo cu mi ta admira hopi. Masha danki
team!”, Vroegop ta termina.
Gregory Croeze di Hunta di Directiva ta conta di e diferente actividadnan cu tin e aña
aki pa yena e programa di tres siman. E siman aki tin beach tennis, nan lo bay lama
y tambe lo tin dia cu nan ta bay bowling y lo tin un dia di ‘pool’ tambe entre otro.
Tambe beach tennis no por falta y un “talenshow”. Riba tereno di Hospital mes
tambe tin yen cos leuk pa e muchanan entretene nan mes manera un speeltuin unda
cu tin e famoso trampoline, mesa di billiard y hopi mas co’i hunga. “Hopi biaha ta
fastioso durante luna di juli ora scol cera pa mayornan haya un luga cu por wak pa e
muchanan mientras nan tin cu traha tur dia. E campamento aki a wordo organisa pa
Hospital hopi tempo pasa pa yuda e empleadonan cu esaki pa entretene nan
yiu(nan)”, Croeze ta splica. Prome pa un siman, despues dos y awo pa prome biaha
un periodo di tres siman. “Loke mas mi ta enjoy ta pa mira cu hasta yiunan cu a
cuminsa bay Hospi Bondi Camp for di nan 4 aña awo ta lider pa yuda guia e
siguiente generacion, “ Croeze a termina.
Por a mira hopi mucha contento y entusiasma, cla pa hunga, trip y crea memorianan
cu lo ta graba pa semper. Un tremendo comienso di Hospi Bondi Camp 2023 cu ta
bay ta tres siman yena di alegria, accion, aventura y amistadnan nobo.
