Secretario di estado di Asuntonan Interno y Relacion di Reino, Eddie van Marum, di 10 te 15 di augustus, lo haci un bishita di trabou na Sint Maarten, Aruba y Corsou. Esaki lo bira su prome biahe pa e parti Caribense di Reino, desde cu el a tuma e cartera di Relacion di Reino di su antecesor. E bishita di secretario di estado Van Marum ta pa cera conoci cu e isla- y gobernantenan. Topiconan importante durante e bishita di trabou ta entre otro siguridad di cuminda, reconstruccion na Sint Maarten y desaroyo economico.
Sint Maarten
E bishita ta inicia mesora despues yegada riba diadomingo, 10 di augustus, cu un tour na tanto e parti Hulandes, como e parti Frances di e isla. Tambe e secretario di estado ta cera conoci cu e teamnan di Representacion di Hulanda na Philipsburg y di e Organisacion di Trabou Temporal. Riba dialuna, 11 di augustus, e parti oficial di e bishita di trabou ta cuminsa cu cera conoci cu gobernador Ajamu Baly, minister-president Luc Mercelina y Conseho di Minister y presidente di parlamento di Sint Maarten, Sarah Wescot-Williams. E atardi ta den cuadro di maneho di crisis durante temporada di horcan y reconstruccion despues di e horcannan devastador, Irma y Maria. E secretario di estado ta papia cu partnernan cu ta atende cu maneho di crisis y ta haci un tour hunto cu National Recovery and Program Bureau (NRPB) na diferente proyecto di reconstruccion. Por ehempel e ta bishita e construccion nobo di e hospital y e proyecto di maneho di sushi: Emergency Debris Management Project. Tambe e secretario di estado lo laga nan inform’e tocante Enterprise Support Project, cu tin como meta, stimula empresanan mediano y chikito local na Sint Maarten. Ta clausura e bishita na Sint Maarten cu un encuentro cu e partnernan di e cadena di mantencion di ley, incluyendo minister di Husticia di Sint Maarten, Nathalie Tackling
Aruba
Diamars,12 di augustus, señor Van Marum lo bula pa Aruba, unda e ta cuminsa cu cera conoci cu colaboradornan di Representacion di Hulanda na Oranjestad. Pa e parti oficial di e bishita di trabou na Aruba, e ta realisa un bishita cerca e gobernador Arubano, Alfonso Boekhoudt. Despues e ta cera conoci cu presidente di Parlamento di Aruba, Marlon Sneek y e lidernan di fraccion di e partidonan den Parlamento Arubano.
Riba diaranson, 13 di augustus, señor Van Marum ta papia cu minister-president, Mike Eman, vice minister-president y minister di Relacion di Reino, Enseñansa, Hubentud, Inovacion y Deporte, Gerlien Croes, y minister di Finansa, Asunto Economico y Sector Primario, Geoffrey Wever. Un di e prioridadnan di e secretario di estado ta e tema di siguridad di cuminda. Pa esaki gabinete a pone EUR 24 miyon disponibel pa medio di un fondo continuo cu mester crea ainda. Na Aruba pa e motibo ey tin riba e programa, un bishita na Agri Innovation Park. E iniciativa aki ta enfoca riba desaroyo agricola duradero y siguridad di cuminda. Den oranan di atardi e secretario di estado ta bishita diferente sitio riba e isla, entre otro San Nicolas y Palm Beach. Na final di e dia, señor Van Marum ta bula bay Corsou.
Corsou
E bishita na Corsou ta cuminsa riba diahuebs, 14 di augustus, cu un combersacion di introduccion cu gobernador Lucille George-Wout. Riba 4 di november e ta baha como gobernador di Corsou, despues di dos termino. Señor Van Marum despues tin un encuentro cu Conseho di Minister di Corsou, bou di guia di vice minister-president, Javier Silvania. Tambe e secretario di estado ta papia cu presidente di Staten, Fergino Brownbill, y e ta cera conoci cu e miembronan di Comishon Relacion di Reino. Den oranan di atardi e secretario di estado ta bishita Hofi Cas Cora, un cunucu ecologico maneha pa empresarionan local hoben. Despues ta tuma luga un combersacion cu partnernan di colaboracion, envolvi cu e tema di fronteranan sigur. Den oranan di atardi e secretario di estado, durante un canamento den e parti di ciudad, Otrobanda, ta topa cu e sociedad civil y representantenan di sector comercial/empresarial na Corsou. Bou di guia di rangernan di e instituto di investigacion, Carmabi, e secretario di estado ta bishita e parke di mangel di Corsou. Na e sitio e secretario di estado lo ricibi informacion tocante vulnerabilidad di pal’i mangel y di coral. Riba e dia aki tin plania tambe pa cera conoci cu e team di Representacion di Hulanda na Willemstad.
Diabierna, 15 di augustus, ta atrobe e ultimo dia di e bishita di trabou. Den oranan di mainta e ta bishita oficina di e Comite di Conmemoracion Pasado di Sclavitud cu a habri recientemente, como tambe e monumento pa lider di resistencia, Tula. Mirando importancia di siguridad di cuminda, secretario di estado Van Marum ta bishita Zakito tambe, caminda e ta papia cu e cooperativa di piscado y un representante di LVV: Agricultura, Cria di bestia y Pesca. Tambe e ta bishita fundacion Bob. E fundacion aki ta haci esfuerso pa proteha y educa tocante parha nativo. Finalmente e secretario di estado, den cuadro di siguridad di cuminda, ta bishita un supermercado local na Corsou.
