“Union ta nos forsa cu ta yuda nos surpasa tur reto”
Aruba, despues di 2 aña, por a cuminsa celebra nos dia nacional, nos dia di Himno y Bandera den grandi, manera como Arubiano, nos tin costumber di haci. Durante fin di siman, den porta di Dia di Himno y Bandera, riba Plaza Gilberto François ‘Betico’ Croes, a tuma luga varios actividad relaciona cu nos dia nacional. Prome Minister Evelyn Wever-Croes na e occasionnan aki a representa Minister di Cultura Xiomara Maduro cu ta den exterior pa trabou.
Durante e prome Concierto Nacional, Prome Minister a dirigi palabranan yen di emocion na pueblo di Aruba remarcando cu profin Aruba por sali despues di tanto tempo atrobe pa celebra nos dia di Himno y Bandera.
“Cuanto mi ta desea pa Aruba complete por mira e bista cu mi tin aworaki riba e plaza. Cuanto hende gozando, celebrando e hecho cu nos por sali y keiro atrobe. E ta un honor y un placer pa mi ta akinan awe nochi na e Concierto Nacional, e prome concierto nacional cu nos ta organisa den cuadro di celebracion di nos Himno y Bandera. Claro nos ta contento cu e libertad y espacionan cu nos tin pero porfin nos por celebra nos dia di Himno y Bandera. Nos ta celebra Aruba. Aruba chikito y simpel bo por ta pero si respeta”, Prome Minsiter a expresa.
Esaki tambe ta e tema e aña aki di nos dia di Himno y Bandera. Chikito y Simpel bo por ta, pero si respeta. Aruba ta un pueblo respeta pa e manera cu nos ta busca otro pa forma union.
“Ta e union ta nos forsa cu ta yuda nos surpasa tur reto. Ta e union ey a guia nos pa pasa den e peor crisis cu nos a caba di pasa aden. Berdad nos ta un pueblo hopi chikito di tamaño pero un pueblo cu gran cordialidad. Ban sigui fomenta e cordialidad aki, ban sigui fomenta y conserva e union aki. Na bienestar di nos mes y di nos yiunan. Nos pais ta bendiciona. Nos ta saliendo di e pandemia y nos a comporta nos mes di un forma sublime durante e periodo aki”, Prome Minister a duna di conoce.
Den nomber di Gobierno di Aruba Prome Minister a gradici Comicion Celebracion Dianan Nacional (CCDN) pa organisa e evento aki hunto cu Comision Promove Cultura, Fundacion Cultural di Festivalnan Folklorico y un y tur cu a coopera.
“Durante pandemia hopi biaha ma bisa, laga nos cuida y laga nos yuda otro, laga nos tey pa esnan mas vulnerabel pasobra nos ta stima nos mes, nos famia y nos ta stima Aruba y awe ban celebra e amor pa Aruba”, Prome Minister a enfatisa.
Prome Minsiter ta desea pueblo di Aruba, for di awo caba, un feliz dia nacional, un feliz dia di Himno y Bandera.
