Dialuna anochi dia 16 di september a tuma luga e apertura di Aruba Global Travel Conference unda Prome Minister Evelyn Wever-Croes a hiba palabra.
E mandatario a gradici e oportunidad pa asina por a dirigi su mes na expertonan den turismo, profesionalnan di biahe y representantenan distingui di e industria di hospitalidad for di Norte America, Latino America y Europa. Den nomber di Gobierno y e pueblo di Aruba, e mandatario a extende un caluroso bon bini na e participantenan na nos isla feliz.
Prome Minister a expresa den su discurso cu e presencia di tur e paisnan na e conferencia ta un testimonio di nan compromiso cu e exito continuo di Aruba su industria di turismo, cual ta hunga un rol importante den e economia, prosperidad y futuro di e pais. E exito di e industria di turismo den e ultimo añanan, den gran parti, ta resultado di e sosten y contribucion firme di e asosiacionnan na Aruba y cu asosiadonan global di aerolinea y operadornan di tour.
Mientras cu e desempeño di turismo di Aruba tawata impresionante na 2024, e inversion di Gobierno den infrastructura, como tambe den producto hotelero nobo y otro industrianan comercial tawata igualmente destacabel y esaki por mira den e varios proyecto rond di Aruba.
Durante añanan Aruba tawata hopi afortuna di ta conoci como un destinacion di calidad halto y Aruba por ta orguyoso cu e inversion den e isla lo sigui pa sigura e reputacion ey den futuro. Gobierno lo sigui traha cerca y conhunto cu Aruba Tourism Authority, AHATA y henter e industria di turismo y hospitalidad explorando oportunidadnan pa inverti mas den e producto y den e experiencia di bishitante.
“Un biaha mas mi kier gradici boso pa boso presencia, nos ta spera cu boso por contagia di e Efecto Aruba. Danki pa e pasion y compromiso cu Aruba y pa tuma tempo for di boso agenda pa uni cu nos e siman aki. Mi ta desea boso un conferencia productivo, placentero y exitoso. Mi ta spera tambe cu boso lo tuma tempo pa boso mes pa conecta mas cu e isla asina por comparti boso experiencianan ora boso regresa cas y mi ta spera di por wak boso pronto atrobe. Masha danki!”, Prome Minister a expresa.
