Manera ta conoci, Prome Minister Evelyn Wever-Croes ta na Nacionnan Uni pa atende e conferencia di “Commission on the Status of Women” (CSW69), unda lidernan di mundo ta enfoca riba kico cada pais a haci y ta haciendo pa mehora e posicion di mucha muhe y hende muhe.
Diamars 10 di maart, Prome Minister a atende un side-event di CSW69, “Threats and Opportunities of Digital Technologies: Women in the public eye”, organisa pa Council of Europe y Yuricko Backes, Minister di Defensa y Igualdad di Luxemburg.
Durante e evento aki Prome Minister di Aruba a hiba un discurso unda riba peticion di e organisacion, el a comparti su experiencia como un hende muhe den wowo publico y e menasanan y oportunidadnan di tecnologia digital.
E mandatario durante su discurso a indica cu un bida publico no ta solamente servicio pero ta resiliencia. Tur dia un hende muhe den liderazgo ta enfrenta abuso online, desinformacion y control cual ta asuntonan cu ta afecta un hende muhe den gran forma, simplemente pa motibo di nan sexo. Esaki no ta solamente un reto personal pero ta un menasa pa democracia ora cu hende muhe ta wordo obliga pa keda keto.
Prome Minister a accentua cu na Aruba, uso di medionan social ta entre esunan mas halto den e region. Segun e estudio Diagnostics on the Technology Divide on Aruba (2022) di Futura, mas di 90% di e poblacion ta envolvi activamente cu plataformanan digital. E conectividad aki ta duna oportunidadnan increibel pa participacion civico, pero tambe ta expone personahenan publico, specialmente hende muhe, na riesgo di acoso, desinformacion y abuso online.
“Pero awe nos ta aki pa recupera nos espacio. Pa sigura cu tecnologia digital no ta un barera, sino un puente, un herment pa empoderamento, inclusion y igualdad. Nos mester fortalece leynan y tuma responsabilidad pa protege bos di hende muhe, tanto online como offline. Aruba ta solidario cu esfuersonan global pa combati violencia facilita pa tecnologia.
Nos ta kere den un mundo digital unda hende muhe por lidera, expresa y contesta sin miedo y hunto nos mester exigi plataformanan cu ta safe, miho strategianan, y e compromiso global pa protege hende muhe den liderazgo. Laga nos sigui e combersacion aki, cu bos firme y yen di curashi.
Pasobra ora hende muhe ta lidera, tanto den politica como den e mundo digital, e futuro ta mas fuerte pa tur hende,”, Prome Minister a termina bisando.
