Diadomingo mainta 16 di februari, manera ta tradicion, Prome Minister Evelyn Wever-Croes, a ricibi e monarcanan di Carnaval 71 na Bestuurskantoor unda a efectua e “Traspaso di Mando” simbolico na Prins y Pancho pa e temporada di Carnaval 2025.
Esaki a tuma luga den un ambiente hopi bunita y anima na unda e monarcanan di Carnaval 71 a yega den un bus na Bestuurskantoor y a wordo ricibi pa Prome Minister di Aruba.
Dilanti e Reinanan di Carnaval 71, representantenan di SMAC, ganadonan di eventonan di Carnaval y e publico carnavalesco, e mandatario a duna un discurso gradiciendo y felicitando principalmente e monarcanan pa e bunita manera cu nan ta carga Carnaval di Aruba, invertiendo tempo y fondo pa asina engrandece nos Carnaval.
Prins y Pancho grandi di Carnaval 71 a lesa e decreto di e maneho cu nan lo desea di hiba durante Carnaval 71, repartiendo cada ministerio y pa esaki nan a haya tur e atencion di nos Prome Minister. E mandatario a felicita nan y a desea nan exito cu e mandato durante carnaval y suerte den e tarea pa guia paradanan di Carnaval 71.
Despues di e traspaso di mando unda yabinan a wordo entrega, e monarcanan di Carnaval y representantenan di SMAC a wordo hiba pa e sala di Conseho di Minister na unda cu Prome Minister a regala nan un bunita pin como gradicimento y asina nan ta keda cu un bunita recuerdo di e bishita tambe.
Tambe Prome Minister a gradici famianan y tur esnan cu di un forma of otro ta pone di nan banda pa asina haci e fiesta cultural mas grandi di Aruba un exito rotundo no solamente na Aruba, pero den wowo di henter mundo.
Prome Minister ta desea Aruba henter un dushi temporada di carnaval y ta gradici tur esnan cu ta tuma nan tempo pa engrandece e fiesta cultural di mas grandi di nos pais. Prome Minister ta enfatisa pa nos tur como un comunidad, gosa Carnaval grandemente y responsabelmente. Cuida nos muchanan di solo y cuida nan oido y permiti nan gosa e fiesta di Carnaval 71 grandemente. Mescos ta conta pa e grandinan. Asina mundo henter por bisa cu aki na Aruba, nos si sa con ta gosa Carnaval.
