Diahuebs siman pasa, Prome Minister mr. Mike Eman, a asisti na Museo Arqueologico Nacional Arubano pa apertura di e Exposicion Lang Leve het Erfgoed. E exposicion aki ta consisti di fotografia di varios fotografo di Aruba cu a recore Aruba completo y saca potretnan di diferente monumentonan di Aruba.
Hunto cu Directora di Monumenten Fonds, Anne Witsenburg, a corta cinta pa oficialmente haci apertura di e exposicion. E fotografianan aki ta duna un impresion di Aruba su herencia, su casnan, colornan vibrante, e diferente elementonnan, patronchi y arkitectura autentico.
Locual a resalta di e exposicion aki ta e bunitesa di nos isla, e creatividad pa crea structuranan cu ta refleha e autenticidad di nos hendenan, pero tambe e vision di e fotografonan cu a sa di capta e imagennan aki for di diferente prespectiva y hunto crea e exposicion unico aki.
