ORANJESTAD– Recientemente Prome Minster Evelyn Wever-Croes a wordo invita como orador na e evento di Nacionnan Uni y World Economic Forum (WEF). Premier a asisti e evento a traves di plataforma online y a trata e topico di “Liderazgo femenino durante tempo di crisis”.
Prome Minister a expresa cu awor ta e momento pa percura pa trece cambio y pa recupera di pandemia. Pa logra esaki ta kere firmemente pa aliña cu tur stakeholder na un meta comun pa haci Aruba mas fuerte y resiliente pa futuro. Teniendo na cuenta tur esnan vulnerabel den nos comunidad. “Aruba ta un ehempel y inspiracion pa hopi Pais, pa e forma con nos a atende cu e crisis. Awor nos lo ta e inspiracion y ehempel un biaha mas, den e recuperacion,” Premier Wever-Croes a expresa.
Premier a sigui bisa cu e ta un honor como e prome Prome Minister femenino di Aruba pa forma parti di avansenan global na nivel di igualdad di genero. Na Aruba specificamente a mira e cantidad di hendenan muhe den nivel di maneho aumenta hopi (nivel record), aunke tin desigualdad entre e sectornan laboral. E realidad pre-COVID ta, cu hende muhe y mucha muhe ainda no ta wordo mira of trata igual. A pesar di tur e avansenan cu a wordo haci, e bareranan ta keda, cual ta impidi cu hendenan muhe y muchanan muhe cu diferente background ta yega nan maximo potencial y oportunidadnan.
Pesey segun Prome Minister Wever- Croes ta splica, a dicidi pa organisa e comision “National Gender Policy” pa adresa e desigualdadnan aki. Cual ta un compromiso entre Aruba y UN-Women.
Remarcabel ta cu COVID ta refleha e retonan cu hende muhe ta confronta cu ne. Den diferente area por mira cu e gruponan vulnerable den nos sociedad, manera hende muhe y muchanan ta wordo confronta cu temponan dificil. Por ehempel, mas tanto hende muhe cu hende homber a perde nan trabou. Mas hende muhe cu hende homber mester a keda cas pa wak e muchanan, pa motibo cu scol a cera y violencia domestico tambe a aumenta como resultado di e aumento di stress. Pues esaki ta refleha cu hende muhe a entrega mas durante di e crisis, Prome Minister a enfatisa.
Concluyendo Premier Wever – Croes a bisa: ‘E retonan nos dilanti por solamente wordo atendi cu ne si nos uni forsa y traha hunto na Aruba. Ban laga e Amor cu nos tin pa nos isla ta loke cu ta guia nos. Nos no lo no laga ningun hende atras.’
