Recientemente Prome Minister Evelyn Wever-Croes tabata presente na e Congreso Statutario di FTA, na unda el a wordo invita pa duna un discurso. E tema e aña aki tabata riba “E riesgonan psychosocial cu lo por tin un efecto riba e mercado laboral”. Prome Minister a indica cu salud mental berdad ta un problema grandi y cu cambionan den e area di trabou di un persona por trece stress y ansiedad cu lo por tin efecto psychosocial cu lo mester di atencion. Ta importante si pa reconoce cu problema mental no ta un asunto personal so, sino ta toca nos cada un riba e isla aki.
E mandatario a sigui splica cu e mundo ta den un era unda e dinamismo di trabou ta cambia continuamente. Awendia e mundo ta technologia digital, globalisacion, y e manera nobo di traha den e economia di “gig” ta drenta nos bida profesional. Pero e mesun technologia cu ta duna progreso, ta bin cu retonan nobo: stress, insiguridad di empleo, y un desbalance entre bida priva y trabou.
Importante ta pa acepta cu e reto di salud mental ta bira cada bes mas y mas prominente, y pa cu esaki, Gobierno di Aruba tin un rol fundamental, y ta tuma e retonan aki na serio. P’esey a inverti hopi den conscientisacion, creando programa pa yuda e hende cu ta sufri di stress y ansiedad.
Prome Minister a expresa di ta satisfecho pa mira cu e esfuersonan aki ta trahando, pero sa cu tin hopi mas pa haci den e area aki. E impacto cu stress por tin riba un trahador, no solamente den trabou, pero tambe den su bida personal ta uno grandi. Aki na Aruba, tur hende sa cu bida no ta solamente traha, pero tambe mester tempo pa disfruta di nos dushi isla den cercania di famia y amigonan. Desafortunadamente sin salud mental, esaki lo por bira dificil.
“Aruba ta un isla chikito, pero grandi den curazon, nos compromiso pa nos pueblo ta haci nos fuerte pa enfrenta cualkier reto nos dilanti. Pero sin salud mental sano, nos no por desaroya como comunidad. Mi ta sigur, cu amor pa nos pais y dedicacion pa nos hendenan, Aruba lo sigui ta mas fuerte, mas uni, y miho prepara pa enfrenta cualkier reto nos dilanti. E futuro ta den nos man y ta nos responsabilidad di crea e pais cu cada un di nos merece.
Mi ta felecita FTA pa un congreso exitoso y pa scoge e tema importante aki. Gobierno ta reconoce cu salud mental ta un reto grandi, y lo sigui inverti y pone atencion na salud mental, pa asina crea un ambiente laboral mas saludabel y sostenibel, y pa brinda ayudo na un forma senciyo na tur esnan cu mester. Masha pabien FTA cu e di 60 aniversario, y cu boso cumpli hopi mas trahando na bienestar di pais Aruba”, Prome Minister a expresa.
