Diaranson 11 di juni, Prome Minister di Aruba, mr. Mike Eman, hunto cu representante di FCCA sra. Maroushka Rafini y Director di Scol di Musica sr. Carlos Bislip, a haci un bishita di inspeccion na un cas disponibel den Semeleerstraat na Noord. E intencion ta pa transforma e cas den un scol auxiliar di musica, cu e meta principal pa crea oportunidad pa hobennan y adulto den bario siña musica y mantene un bario activo y e hobennan for di caya.
Segun Prome Minister Eman, e scol di musica den Semeleerstraat ta parti di un vision mas amplio pa desaroya bario pa bario y pa lanta infrastructura educativo, social y cultural directamente den e barionan. E scol lo sirbi no solamente pa hobennan, pero tambe pa adulto cu tin deseo pa siña toca instrumento of participa den actividad musical.
E idea a surgi apenas algun siman pasa durante e bishita di e prome Accion di Bario riba Semeleerstraat, unda Prome Minister Eman a topa cu un cas bandona. E doño di e cas a drenta un cas di cuido, y e cas a keda bashi. Prome Minister a tuma e oportunidad pa propone un destino constructivo pa e cas y a tuma contacto cu FCCA pa presenta e vision y busca apoyo, cu a resulta den un colaboracion positivo.
Un aspecto bunita di e proyecto ta cu lo dedica e scol na sra. Ramona Visser, cu a biba gran parti di su bida den e cas aki. Prome Minister a expresa cu e dedicacion ta un forma di honra y di reconocemento pa personanan cu a forma parti di e bario su historia.
Sr. Carlos Bislip, cu lo carga e proyecto, a recorda cu 40 aña pasa sr. Rene Herde a yega di propone un idea similar. Awo cu e idea ta bira realidad, Bislip ta motiva pa pone su experiencia na disposicion di e proyecto. E cas ta conta cu varios kamber, cada un ideal pa lesnan di instrumento specifico manera trompet, drum, guitara y piano. E scol di musica por fungi como un extension di e proyecto di leerorkest, pa duna continuidad na e desaroyo musical di e muchanan despues di scol basico.
E scol den Semeleerstraat lo sirbi como un dependance di Arubaanse Muziekschool, cu ya caba ta presente den Santa Teresita Center na San Nicolas y na Scouting na Santa Cruz. E scol lo yuda pa saca energia positivo for di e hobennan y guia nan den un direccion constructivo.
Sra. Maroushka Rafini di FCCA a expresa su entusiasmo pa e proyecto y a confirma cu e idea ta alinea perfectamente cu e vision holistico di FCCA. Nan ta traha pa fortalece barionan social, y scol di musica ta un medio ideal pa yega e meta aki, cu respet y desaroyo digno pa comunidad.
