Prome Minister Mike Eman a ricibi Sra. Joanna Kazana-Wisniowiecki, Coordinador Residente di Nacionnan Uni pa Trinidad & Tobago, Aruba, Corsou, Surinam y Sint Maarten, den marco di su bishita oficial na Aruba.
E reunion aki ta sigui e intercambio inicial cu a tuma luga durante e Foro OCT–EU na Aruba luna pasa y ta forma parti di un trayectoria continuo di dialogo di nivel halto entre Aruba y e sistema di Nacionnan Uni. Tambe e ta sigui e bishita di maart 2026 di e Representante Permanente di Reino Hulandes na Nacionnan Uni, cu a habri caminda pa mas cooperacion estrategico orienta riba resultado.
Joanna Kazana-Wisniowiecki ta e representante di rango mas halto di e Sistema di Desaroyo di Nacionnan Uni na nivel multi-pais y ta sirbi como representante di e Secretario-General di Nacionnan Uni. Cu mas cu 20 aña di experiencia den cooperacion internacional, el a ocupa posicionnan di liderazgo den diferente pais, incluyendo como Coordinador Residente na Belarus y funcionnan halto den UNDP.
Durante e encuentro, a reafirma e compromiso comparti pa fortalece cooperacion entre Aruba y Nacionnan Uni riba prioridadnan nacional y global, incluyendo resiliencia climatico, restauracion di naturalesa, gobernacion, inclusion social, innovacion economico y desaroyo sostenibel.
Ademas, e delegacion di Nacionnan Uni a sostene reunion cu conseho di minister, pa profundisa cooperacion den area di prioridad.
Prome Minister Eman a enfatisa cu Aruba, como Small Island Developing State (SIDS), ta enfrenta retonan specifico den acceso na climate finance y sosten tecnico internacional, apesar di su vulnerabilidad climatico y su compromiso fuerte cu Agenda 2030 y e Sustainable Development Goals (SDGs).
Den e cuadro aki, Aruba a comparti su vision pa converti cooperacion internacional den accionnan concreto cu ta crea impacto real pa comunidad, door di:
- fortalecemento institucionalÂ
- desaroyo di capacidadÂ
- acceso na finansiamento internacionalÂ
- asociacionnan strategicoÂ
- innovacion y diversificacion economicoÂ
- sosten pa proyectonan di restauracion di ecosistema y resiliencia climaticoÂ
Tambe a trata Aruba su contribucion na Reino su Voluntary National Review 2027 (VNR), unda Reino Hulandes lo presenta progreso riba e Metanan di Desaroyo Sostenibel na Nacionnan Uni. Aruba ta mira esaki como un oportunidad importante pa comparti solucionnan inovativo di Estadonan Insular Chikito den un contexto di Reino.
Durante e intercambio, a destaca e importancia di alinia planificacion nacional cu e Multi-Country Sustainable Development Cooperation Framework (MSDCF 2022–2026), cu ta enfoca riba prosperidad, inclusion, estado di derecho y resiliencia climatico.
Prome Minister Eman a subraya tambe cu e vision nacional di Aruba, “E Bienestar Comun: E Cas cu Nos Ta Construi Hunto”, ta conecta naturalmente cu principionan di Nacionnan Uni di desaroyo inclusivo, dignidad humano y “no laga ningun hende atras”.
Como parti di e bishita, Sra. Kazana lo presenta un sesion strategico na Conseho di Minister riba futuro cooperacion entre Aruba y Nacionnan Uni. Ademas, e delegacion di Nacionnan Uni lo sostene reunionnan cu diferente ministerionan, interesadonan y organisacionnan di sociedad civil pa profundisa cooperacion den area di prioridad.
Gobierno di Aruba ta aprecia e relacion fuerte y constructivo cu Nacionnan Uni y ta comprometi pa sigui fortalece partnershipnan internacional cu ta contribui na un futuro mas resiliente, inclusivo y sostenibel pa Aruba y su futuro generacionnan.
