Prome Minister di Aruba, Mike Eman, a reuni cu Minister di Asuntonan Exterior di Hulanda, Tom Berendsen, den e edificio historico Johan de Witthuis na Den Haag. Durante e encuentro, ambos mandatario a dialoga tocante e situacion geopolitico den region Caribe, particularmente Venezuela, y e posibilidadnan pa fortalece cooperacion entre Aruba y Hulanda den politica exterior y desaroyo economico. E delegacion di Aruba tabata consisti di Prome Minister Mike Eman, Minister Plenipotenciario di Aruba na Hulanda, Mildred Schwengle, y Minister di Turismo, Transporte y Labor, Wendrick Cicilia.
Durante e encuentro, Prome Minister Eman a reflexiona riba e momentonan di incertidumbre cu Aruba a pasa durante e periodo di tension entre Venezuela y Merca. Eman a expresa su gratitud pa e atencion y sosten cu Aruba a ricibi di Ministerio di Defensa y Ministerio di Relacionnan Exterior di Hulanda. Segun e prome minister, durante e periodo aki Aruba semper a sinti su mes proteha door di e atencion special cu e instancianan aki a brinda na e situacion den region. Eman a indica cu e sosten aki ta algo cu Aruba ta aprecia profundamente y cu el a comparti esaki biaha mas cu minister Berendsen.
Di su banda, minister Berendsen a destaca importancia di cooperacion den Reino Hulandes den un mundo cu ta enfrenta diferente cambio geopolitico. Segun e minister, ta importante pa e paisnan den Reino intercambia perspectiva y uni nan interesnan pa asina por enfrenta cualkier desaroyo internacional hunto. Otro tema cu a toca ta e posibilidadnan pa mehora cooperacion den politica exterior. E minister a expresa satisfaccion cu e dialogo y confiansa den relacion entre Hulanda y Aruba den futuro.
Oportunidad economico den region
Banda di e aspecto di siguridad, Prome Minister Eman a destaca cu Aruba tambe ta mira oportunidad importante den e desaroyonan regional. E prome minister a menciona e cooperacion reciente cu Wageningen, cu ta enfoca riba explora e mercadonan den region for di Aruba. Segun Eman, e intencion ta pa no solamente trece Wageningen na Aruba, sino tambe otro institucion Hulandes cu por contribui na e desaroyo di oportunidad economico nobo. Eman a indica cu gobierno di Aruba kier sigui traha cu Hulanda pa haci e cooperacion aki posibel.
Na final di e encuentro, Prome Minister Mike Eman a entrega minister Berendsen un recuerdo special, consistiendo di e escudo di Aruba traha den un pieza di palo, combina cu un compas. E simbolismo di e regalo ta representa esaki guia den haya direccion bek pa Aruba, pues un invitacion pa minister Berendsen bishita e isla den futuro.
