Prome Minister Mike Eman hunto cu Minister di Salubridad, Asunto Social, Cuido di Hende Grandi y di Adiccion, Mervin Wyatt-Ras, a anuncia awe dos iniciativa di ley di gran impacto cu ta fortalece e fundeshi social di Aruba di un manera duradero y impactante. Ta trata di e Landsverordening Langdurige Zorg Aruba y e Landsverordening pa compensacion di mucha cu mester di cuido intensivo.
Cu e leynan aki, Gabinete AVP-Futuro ta scohe conscientemente pa solucionnan structural cu ta parti di e bon comun: bienestar, dignidad humano y cohecion di nos comunidad Arubiano, awe y den futuro.
Landsverordening Langdurige Zorg Aruba
Marco legal propio, fondo propio y financiamento structural
E “Landsverordening Langdurige Zorg Aruba” ta introducí pa prome biaha un marco legal special pa cuido di largo plaso na Aruba (cuido pa nos grandinan). Asina ta bin cu un distincion cla entre cuido curativo (hospital) y cuido di sosten, manera cuido di hende grandi, cuido pa pashentnan cu ta sufri di malesanan cronico y cuido pa hende cu un of mas limitacion.
E cuido di largo plaso ta realisabel cu:
- un presupuesto propio y financiamento structural;
- un fondo separa “Langdurige Zorg Aruba”
cobertura colectivo basa riba solidaridad; ta inicia cu destina parti existente di BBO y BAZV pa e cuido aki.
- ehecucion y administracion pa AZV, den un marco legal cla.
Lo duna e cuido a base di indicacion obhetivo y organisa den producto di cuido, cu ta varia for di cuido na cas te cu cuido intramural den casnan di cuido.
E financiamento ta forma di un manera neutral, pa medio di redistribucion den medio financiero existente, sin subi e presion financiero total.
E landsverordening aki ta planea pa drenta na vigor 1 di januari 2027.
Compensacion pa mucha cu mester di cuido intensivo
Sosten pa famianan cu ta carga un peso extra tur dia
Minister President Eman y Minister Wyatt Ras ta anuncia e Landsverordening pa compensacion di mucha cu mester di cuido intensivo. E ley aki ta provee un compensacion financiero mensual pa famianan cu mucha cu un of mas limitacion of condicion cu ta un nesesidad cla pa cuido intensivo.
E reglamento:
- ta forma un extension di e leynan di asistencia social;
- ta parti di reformanan social mas amplio y sosten di poder di compra;
- ta apunta – segun e debate di presupuesto – pa un compensacion di mas of menos Afl. 500 pa luna pa mucha.
E ambicion ta pa pone e reglamento aki na vigor lo mas lihe posibel den 2026.
E Bon Comun como principio di guia
E gobernacion ta pone tur dos ley explicitamente den e marco di e Bon Comun como punto principal di guia. E tarea cu ta sirbi e Bon Comun ta pidi responsabilidad publico, financiamento structural y predicibel, un anker institucional duradero.
E experencia cu Algemene Ziektekosten Verzekering (AZV) y Aruba Tourism Authority (ATA) a demostra cu tareanan publico cu un utilidad social amplio ta funciona miho ora nan ta organisa den un structura legal cla, cu financiamento y fuente di entrada fiho y ehecucion profesional. Tanto cuido como turismo ta reconoci na Aruba como parti di e Bon Comun y pesey ta firmemente fundamental.
Den e mesun liña di pensamento, Gabinete AVP-Futuro ta scohe pa no laga mas e cuido di hende grandi y otro grupo vulnerabel depende di subsidionan ad-hoc of solucionnan temporal, sino pa ancra nan di un manera duradero den ley, financiamento y organisacion.
Minister-President Mike Eman:
“E Bon Comun ta un luz di guia cu ta yama pa un responsabilidad profundo pa e bienestar general di henter un Pueblo y Pais, e ta encera un encargo gubernamental y un responsabilidad di henter sociedad. Unda e bienestar y dignidad di hende ta central, e gobernacion mester ofrece structura, continuidad y husticia, pa asina involucra comunidad na un manera amplio. Bon Comun ta un yamada consistente pa keda haci esfuerso pa realisa un mihor calidad di bida pa comunidad henter.”
Minister Mervin Wyatt-Ras ta agrega den e espirito di e Bon Comun:
“Cu e leynan aki nos ta duna reconocimento na hende cu hopi biaha ta keda invisibel: nos grandinan y famianan cu mucha cu mester di cuido intensivo. Nos ta scohe conscientemente pa siguransa, dignidad y sosten cu no ta temporal, sino structural y confiabel.”
Na caminda pa un sistema social duradero
Cu e dos leynan aki, Gabinete AVP-Futuro ta pone un paso decisivo den direccion di un sistema social humano, husto y prepara pa futuro, unda cuido no ta percibi como un gasto, sino como un inversion den hende y comunidad.
Parlamento di Aruba lo ricibi e landsverordeningen den e periodo binidero pa tratamento.
