13 di maart 2023
“Esfuerso di union y positivismo di cada ciudadano a contribui na e recuperacion di nos pais”
Dialuna 13 di maart 2023, ta marca den nos historia como un dia cu a impacta Aruba fuertemente. 3 aña desde Covid 19 a drenta nos pais. Ni un ciudadano di nos mundo a pensa tampoco por a preveni e impacto aki. Sinembargo, mundo henter a lucha y tuma medidanan drastico pa contene e pandemia y pa stop e virus di sigui plama y causa mas daño.
3 aña pasa, Gobierno di Aruba tambe mester a tuma pasonan drastico pa yuda salba tur ciudadano di un pandemia cu a bati na porta di tur pais rond mundo. Entidadnan financiero internacional a remarca cu Aruba tawata e pais den nos region cu mas a wordo afecta. Pero tambe nan ta reconoce cu Aruba ta e pais cu miho a y ta recuperando. Esaki no ta debi solamente na e pasonan lihe cu Gabinete Wever-Croes I a tuma, sino tambe ta danki na esfuerso di cada ciudadano cu a keda den union y positivo durante e periodo hopi dificil aki.
Prome Minister, Evelyn Wever-Croes, den nomber di Gobierno di Aruba ta gradici cada ciudadano cu a demostra firmesa den e compromiso cu nos tin pa sigui lucha pa hunto hiba nos pais padilanti. Esfuerso di cada ciudadano a contribui na e recuperacion di nos pais. Den union y positivismo nos ta logra un miho bienestar pa Aruba y crea un futuro prospero pa nos yiunan.
“Si nos mira atras riba e tres añanan tras di lomba, nos por mira un periodo hopi difícil cu a trece hopi preocupacion y incertidumbre pa nos tur. Pero nos por mira tambe un periodo caminda cu nos cu ta biba aki na Aruba, a bay bek na nos raisnan, na nos custumernan. Nos a uni bek como pais. Pa e motibo aki tambe, mi tin tur fe y confiansa cu lo bay nos bon den futuro. Pasobra, manera nos himno ta bisa, nos ta tene firme na e fortalesa di nos baranca tan stima. Pasobra nos amor pa Aruba ta asina grandi, cu’n tin nada pa kibre. Nos a mustra cu den union y positivismo, Aruba ta sali victorioso. Esey ta loke nos a demostra den e tres añanan aki, y pa esey mi kier yama bo danki. Danki Aruba”, Prome Minister Evelyn Wever-Croes a expresa.
