Sigui cuida! E ta den man di cada ciudadano pa goza sanamente

E siman aki, ta Semana Santa, dianan di reflexion pa hopi ciudadano. Un siman na unda hopi ta para keto pa reflexiona riba e direccion cu bida ta hiba nos. Nos ta reflexiona riba e scacrificionan cu nos a haci y e triunfonan cu nos a logra den nos bida y con pa conbina nan pa nos sigui bay padilanti. 

Tambe esaki ta bira e siman di vakantie di scol pa nos muchanan na unda cu tradicionnan di tur aña den e temporada aki, ta cu hopi famia ta bay cu vakantie afo y tambe hopi di esnan cu no ta biaha, ta keda aki mes y ta bay campa cu nan famia. Durante conferencia di prensa di Gobierno di Aruba dialuna mainta, Prome Minister Evelyn Wever-Croes a haci un apelacion na tur ciudadano di nos pais, pa nos sigui cuida mirando cu Covid tey ainda. 

Aruba ta un di e paisnan cu a flexibilisa casi tur medida. Ta importante pa tur esnan cu tin pensa di biaha e dianan aki, pa informa adelanta kico ta e procedura y rekisitonan di otro paisnan. Entrada pa Merca ta rekiri vacunacion y un muestra di test negativo. Ta bon pa sa tambe e medidanan vigente di cada pais y Aruba y evita problemanan innecesario. 

Pa loke ta trata campamento, despues di dos aña esaki por atrobe. Pa tur esnan cu tin pensa di campa cu nan famia, e apelacion ta bay tambe pa nan sigui cuida. Covid tey tur caminda na Aruba. Ya tur hende sa kico mester haci pa cuida su famia. E ta den man di cada ciudadano pa goza sanamente. Tambe ta haci un apelacion pa uzuarionan di nos beachnan, cu a wordo drecha, pa nos sigui cuida nos beachan y laga nan limpi bek atras. Cuida nos naturalesa pa cada ciudadano y bishitante goza mas di nan.

 “Mi ta desea maestronan y alumnonan un dushi siman di vakantie. Pa nan descansa. Pa tur famia cu ta biaha, sigui cuida y esnan cu ta bay campa, goza di nos bunita lama y beachnan y nos naturalesa. Cuida nos naturalesa pasobra nos tin’e presta di nos futuro generacionnan. Ban cuid’e, lag’e limpi y sin destruccion, pa asina nos tur por sigui goza di dje sanamente.”, Prome Minsiter a termina bisando. 

LEAVE A REPLY

Please enter your comment!
Please enter your name here