ORANJESTAD – Na aña 2008 Gobierno di Aruba a dal e prome paso den direccion di transicion pa energia mas limpi. E tempo ey Aruba a construi su prome Parke di Molina na Vader Piet. Na aña 2009 el a drenta den funcion produciendo 30 Megawatt (MW) di coriente cual ta bon pa 16 % di e total di capacidad di coriente cu Aruba tin mester. Pa e siguiente añanan Utilities Aruba hunto cu WEB y ELMAR lo tin e tarea pa ehecuta e plan nacional di energia di Gobierno pa logra cu nos mes ta produci 45 pa 50 % di nos energia; cual lo ta limpi, renobabel y pagabel.
Durante Gabinete Wever-Croes I a alinea tur stakeholders den sector di energia na Aruba pa yega na un meta comun pa Aruba. E “Energy Policy” aki ta delinea e trayecto cu Aruba lo cana pa logra reduci e dependencia di HFO cu 45 pa 50% pa anja 2023.
Mientras Aruba ta recuperando di e pandemia mundial Covid-19, nos a wordo confronta cu un otro crisis mundial: e guera di Ukraina. Un guera cu ya ta durando pa 6 luna y cu a causa un crisis energetico mundial, cu a causa inflacion severo den prijs di crudo, gas y consecuentemente di energia. Nos companianan estatal di utilidad, a absorbe mas cu nan tabata por di e impacto di aumento di costo di energia. Sinembargo pa nan por sigui opera pa Aruba como pais por sigui funciona y desaroya, e prijsnan mester a wordo ahusta. Cu menos efecto inflatorio y mas social cu ta posibel.
Afortunadamente Gobierno di Aruba ya tabata tin su plan nacional di energia cla, y cual ta inclui reduci dependencia di HFO y expande nos capacidad pa produci mas energia di e biento cu ta supla constante; e noordoostpassaat cu nos dushi isla di Aruba ta bendiciona cu ne. Y tambe genera mas energia di esolo.
E meta ta cu pa 2050 lo por logra di ta “Klimaat Neutraal” esta cu nos a logra elimina tur emision di CO2 of si tin mes; nos lo tin suficiente produccion di energia limpi pa compensa e cantidad di CO2 emiti.
Aki ta pensa riba suministra WEB cu gas natural LNG como e fuel di transicion. Awor e siguiente paso ta wordo tuma pa expande nos capacidad di energia di biento y asina pronto lo yama ayo na HFO y bonbini na un futuro di energia mas limpi, renobabel y cu prijs stabiel. Tur esaki lo ta bon pa nos economia, nos salud y bon pa nos planeta.
