Diahuebs ultimo, Prome Minister tabata presente na e inauguracion di e edificio nobo di Atlas Risk Solutions, na unda cu el a duna un discurso na tur esnan presente. Prome Minister a indica cu Atlas Risk Solution ta un di e companianan mas confia den e area di seguro y “risk management” pa mas di 3 decada caba, y cu un presencia fuerte na Aruba pa e ultimo 16 añanan. E meta di Atlas ta pa duna servicio di “risk management” personalisa, independiente y sin conflicto, cual a haci nan un partner esencial den Aruba su comunidad empresarial.
E edificio nobo aki ta den curason di Oranjestad, y tabata antes unda Camara di Comercio y varios otro negoshi tabata ubica. Durante añanan e edificio aki a bay hopi atras, y mirando con bunita el a wordo renoba ta realmente impresionante.
“E no ta solamente e expansion di un compania pero un inversion den e futuro di Oranjestad. E ta un simbolo di crecemento, resiliencia, y dedicacion, cu ta refleha Atlas Risk Solution su compromiso na excelencia y e clientenan cu nan ta sirbi. Como Prome Minister di Aruba, semper mi a promove e importancia cu nos industria empresarial tin, pa preserva nos cultura y herencia economico. Companianan manera Atlas Risk Sultions cu a scoge pa inverti den nos capital, ta sigura cu Oranjestad lo keda e centro dinamico y prospero pa futuro generacionnan.
Den nomber di Gobierno di Aruba, mi ta gradici Atlas Risk Solutions pa kere y inverti den Aruba, y pa kere den e vision di Gobierno di Aruba. Pa hopi tempo Gobierno ta pensando con pa revitalisa e centro di Oranjestad, y ohala e paso aki cu Atlas a tuma pa revitalisa un edificio bieu, sirbi como inspiracion pa otro comerciantenan, inversionistanan y doño di e edificionan pa inverti y renoba tur e otro edificionan cu ta den mal estado.
Hopi ta esnan cu ta pidi tereno pa asina por lanta nan negoshi, pero en realidad tin hopi edificio caba cu ta para bashi y cu mester solamente un poco inversion pa ta un joya di luga. P’esey mi kier encurasha tur esnan cu ta buscando tereno, mirando cu no tin hopi tereno mas disponibel, y e proceso ta uno largo, pa considera inverti den un di e luganan aki. Di curason mi ta gradici Atlas y e team completo cu ta brinda e servicio aki, y mi ta desea nan hopi exito den e edificio nobo aki”, Prome Minister a expresa.
