E Fundacion Anti Droga Aruba (FADA) ta e organisacion cu ta traha riba conscientisacion di e efectonan di abuso di droga. Actualmente, nos ta den e Siman di Cinta Cora 2024, Siman di Locura 2024 di FADA’. Dialuna ta dia di bisti cora. Diamars ta dia di bisti color neon. Diaranson ta dia di bisti meya di emocion. Diahuebs ta dia di bisti na actor, artista of caricatura faborito y finalmente, diabierna ta dia di crea bo mesun bril.
Esaki ta un siman pa uni pa un solo causa —un causa cu ta afecta nos comunidad, nos famia, y nos futuro. E siman aki ta un recordatorio poderoso di e peligro cu nos hobennan ta enfrenta y e responsabilidad cu nos tur por asumi pa proteha nan.
Nos ta biba den un mundo na unda cu e tentacion, e presion y e posibilidad pa nos muchanan y nos hobennan experimenta cu droga, ta presente tur dia. Y e impacto cu esaki por trece cu ne ta devastador. Den nos comunidad tin un desaroyo alarmante di muchanan y hobennan mas jong ta haña nan den problema di abuso di droga. Abuso di droga no solamente ta un asunto di nos hobennan, e ta un problema di un sociedad cu un demanda pa tuma accion rapido.
A traves di FADA, tin un bon canal pa yega na nos hobennan pa conscientisa nan cu abuso di droga no ta algo cu ta yuda nan. Talves algun ta mira den esey un solucion rapido y temporal pa un situacion pero e abuso aki ta trece su efectonan negativo pa hopi tempo nan dilanti. FADA ta haci un trabou hopi importante y e ta un stakeholder importante pa Gobierno di Aruba den combatimento di adiccion di droga.
Como un comunidad cu ta stima nos pais, nos mester uni y para hunto pa combati e problematica aki y ta mas comprometi pa sostene esnan cu ta traha duro pa purba cambia bida di esnan cu a cay den droga, nos maestronan, profesionalnan y FADA entre otro. E participacion di comunidad ta hunga un rol hopi importante. Tur mayor, tur mentor, tur tanta y omo, wela y welo, amigo, tur role model pa e hubentud, mester papia abiertamente cu nos hobennan, y mustra nan cu semper tin alternativa y ofrece nan e apoyo na momento cu ta nota cu nan ta enfrenta problema.
Educacion y prevencion ta cuminsa na cas y hunto cu comunidad, Aruba ta logra fomenta un ambiente di siguridad unda nos hobennan ta sinti cu nan ta wordo scucha, apoya y empodera pa haci un escogencia saludabel.
“Dialuna, door di bisti cora, nos ta declara y reenforsa nos compromiso na e bienestar di nos muchanan y nos hobennan cu ta nos prioridad. E siman aki y padilanti, laga nos sigui educa, conscientisa y inverti den solucionnan pa proteha nos muchanan y nos hobennan di abuso di droga.
Danki FADA pa boso esfuerso y dedicacion, danki na cada maestro y profesional den cuido cu ta traha incansabelmente pa yuda combati e problema aki y ta yuda nos hobennan mira otro alternativa. Mi ta desea FADA hopi exito e siman aki. Gobierno di Aruba ta uni su mes na e siman di conscientisacion aki di FADA. Laga nos tur uni na e siman di conscientisacion, compasion y compromiso aki. Hunto nos por crea un futuro mas briyante, saludabel pa nos muchanan y hobennan na Aruba”, Prome Minister a termina bisando.
