Diaranson 3 di juli, Prome Minister Evelyn Wever-Croes a reuni cu e comisionHulandes cu ta coordina condecoracionnan pa henter Reino, Kapittel voor de Civiele Orden.
![](https://solodipueblo.com/wp-content/uploads/2024/07/MP-Kapittel-voor-de-Civiele-Orden-a-elogia-Comision-Condecoracion-Real-6-1024x683.jpg)
Durante e encuentro, presidente di e comision di Hulanda, Ank Bijleveld, a duna palabra di elogio na Comision Condecoracion Aruba pa e bon trabou cu nan ta haciendo. Señora Bijleveld a menciona cu e comision di Aruba ta prepara proposicionnan bon funda reflehando e trabou extenso di e comision prome cu haci e entrega. Aruba ta destaca den henter Reino pa e cantidad di proposicion entrega y esey ta un echo hopi positivo ya cu e ta un muestra cu na Aruba tin hopi persona cu ta bin na remarke pa un condecoracion.
![](https://solodipueblo.com/wp-content/uploads/2024/07/MP-Kapittel-voor-de-Civiele-Orden-a-elogia-Comision-Condecoracion-Real-5-1024x683.jpg)
Prome Minister a splica cu pa un ciudadano bin na remarke pa un reconocemento asina, lo mester adheri na cierto rekisitonan. E persona mester ta eherce trabou boluntario pa un periodo minimo di 15 aña, y e persona mester a haci prestacionnan particular den nan funcion actual. E prestacionnan den tur dos categoria mester ta di un nivel hopi halto, surpasando loke normalmente ta wordo spera di su trabou y mester tin un balor excepcional pa e desaroyo di Aruba.
![](https://solodipueblo.com/wp-content/uploads/2024/07/MP-Kapittel-voor-de-Civiele-Orden-a-elogia-Comision-Condecoracion-Real-4-1024x683.jpg)
Pa entrega un proposicion pa Condecoracion Real 2025, mester yena dos formulario cu ta disponibel na Bestuurskantoor na Playa y San Nicolas, tur MFA, y online riba e website di Gobierno. E formulario mester wordo yena detayadamente y firma door di e persona y/of instancia cu ta haci e proposicion.
![](https://solodipueblo.com/wp-content/uploads/2024/07/MP-Kapittel-voor-de-Civiele-Orden-a-elogia-Comision-Condecoracion-Real-3-1024x683.jpg)
E ultimo dia pa entrega e proposicion ta dia 31 di Juli, 2024 pa 4 pm na Bestuurskantoor na Playa. Unabes e proposicion wordo entrega, e lo wordo repasa pa e comision di Aruba pa wak si a cumpli cu tur rekisito, pa despues wordo manda pa Hulanda cu lo tuma e decision final.
![](https://solodipueblo.com/wp-content/uploads/2024/07/MP-Kapittel-voor-de-Civiele-Orden-a-elogia-Comision-Condecoracion-Real-2-1024x613.jpg)
“Ainda tin tempo pa entrega un proposicion. Si abo conoce un persona cu ta un inspiracion pa comunidad en general y merece e Condecoracion Real, entrega e proposicion pa asina e persona aki tambe lo por haya su reconocemento for di Rey Willem Alexander”, Prome Minister a indica.
Pa download e formularionan:
Email adres: