Prome Minister Evelyn Wever-Croes, durante su participacion den e programa Interes di Pueblo na Top FM 95.1, a papia riba e resultadonan di eleccion y e actual proceso di formacion di e proximo gobierno. Durante eleccion, partido AVP a ricibi 9 asiento, partido MEP a logra 8 y como resultado AVP a asumi e rol di forma un gobierno hunto cu partido FUTURO.
Prome Minister a destaca cu, aunke a firma un declaracion relaciona cu e negociacionnan, esaki no a wordo divulga ni presenta publicamente. E enfoke aki ta contrasta cu esun adopta pa MEp durante su propio proceso di formacion di gobierno, ora cu a compromete na transparencia total, a publica tur detaye y a ofrece briefings regularmente na prensa. Segun Wever-Croes, e nivel aki di apertura no por observa den e negociacionnan actual, loke ta genera un silencio notabel den e proceso.
Den cuadro di esaki, e combersacionnan entre AVP y FUTUR ta sigui avansa di forma reserva of secreto. Mientrastanto, MEP a purba na varios ocasion pa drenta den dialogo cu partido FUTURO, pero e ultimonan aki a dicidi pa no dialoga, argumentando cu nan ta enfoca den e negociacionnan cu AVP.
Wever-Croes tambe a señala cu e promesa di Mike Eman di aumenta pension na 700 florin tabatin un impacto significativo den e resultadonan electoral, siendo clave den e diferencia di 312 voto cu a faborece AVP. Sinembargo, despues di anuncia cu dicho promesa no lo wordo cumpli den e plaso di 100 dia, e panorama politico a cambia.
E proceso di formacion di gobierno ta sigui avansa, pero MEP, sin un rol activo den e negociacionnan aki, ta observa con esakinan ta desaroya memey di un silencio cu ta contrasta cu e principionan di transparencia defendi previamente.
