Gobierno di Aruba a traves di FUTURA ta yuda diferente scol pa haya borchi digital den cuadro di e proyecto e-Learning. E proyecto aki a inicia na 2019 y Scol Cacique Macuarima tabata e prome scol pa haya borchi digital. Despues a sigui Cacique Aterima, Colegio Pastoor Kraanwinkel y awo ta toca turno na St. Franciscus College. Si conta tur e scolnan hunto ta trata di 800 alumno cu ta haya les cu e proyecto E-Learning. Banda di cu tur klas ta ricibi e borchinan digital, tur docente ta haya laptop Chrome pa prepara e lesnan y duna les. Prome Minister Evelyn Wever-Croes a duna un bishita na e scol diamars mainta.
Prome Minister Evelyn Wever-Croes a splica cu parti di e poroyecto tambe ta pa yuda docentenan den con pa traha cu e borchinan. Teniendo na cuenta cu e ta un cambio grandi den e forma di duna les y ta importante pa docentenan por sa kico tur por haci cu e borchinan pa e muchanan por probecha di esaki.
Sra. Anuesca Baly directora di SKOA a expresa di ta sumamente contento cu un otro scol a ricibi borchi digital. “St. Franciscus College ta di 4 scol di SKOA cu ta ricibi e oportunidad pa forma parti di e proyecto di Futura. Como directora ta aplaudi esaki pasobra un di e metanan ta pa yega na duna les digital na tur e scolnan. Ta consciente cu e ta tuma tempo pero poco poco ta yega na esaki”.
Sra. Nadine Kirindongo cabesante di e scol tambe a keda sumamente contento y ta agradici na tur cu a haci posibel pa e soño y vision di e scol bira realidad.
Por ultimo, Premier Wever-Croes a gradici Parlamentario Meneer Edgard Vrolijk pa e sosten den e proyecto y henter staff di St. Franciscus College y tambe na directora di SKOA.
Gabinete Wever-Croes, a traves di e proyecto aki por sigui contribui na mehoracion di calidad di enseñansa na Aruba y motiva muchanan pa participa na les.
