Den cuadro di su bishita oficial na Corsou, Prome Minister di Aruba, Mike Eman, a bishita base di Marina Real Parera, caminda el a keda ricibi pa Comandante di Marina Real Hulandes den Caribe (Commandant der Zeemacht in het Caribisch Gebied), Comandante Walter Hansen.
Durante e bishita, Prome Minister Eman a haya un recorido den e facilidadnan di Wardacosta Caribe Hulandes (Kustwacht) y Maritiem Operatie Centrum (MOC), caminda el a haya informacion tocante e operacionnan di siguridad y defensa cu ta wordo coordina pa proteccion di e parti Caribense di Reino Hulandes.
Comandante Walter Hansen a expresa su satisfaccion di por a ricibi Prome Minister Eman na e centro di operacion y sede principal di Defensa Hulandes y Wardacosta. Segun Hansen, ta importante pa tur habitante di e parti Caribense di Reino Hulandes sa cu Defensa Hulandes ta presente pa proteha e territorio y contribui na siguridad di e islanan. Hansen a splica cu for di base di Marina Real Parera ta dirigi e operacionnan di Defensa Hulandes y Wardacosta den henter e parti Caribense di Reino Hulandes, incluyendo Aruba. E recorido a brinda oportunidad pa mustra con e diferente unidad ta traha pa mantene siguridad den region.
Di su banda, Prome Minister Mike Eman a expresa su satisfaccion cu e oportunidad di bishita e base na Parera. El a indica cu, aunke regularmente e ta encontra Comandante Hansen, e bishita aki a brinda oportunidad pa conoce di cerca e facilidadnan y e trabou cu ta wordo realisa for di Corsou. Prome Minister Eman a destaca cu e bishita ta confirma den practica e proteccion di integridad teritorial di Aruba y e otro islanan den Reino. Segun Prome Minister, e inversionnan y operacionnan cu ta wordo realisa pa seguridad di e islanan ta brinda un sintimento di trankilidad, specialmente mirando cu tin vigilancia continuo, 24 ora pa dia y shete dia pa siman, pa identifica posibel menasa y proteha e nos teritorio.
E oportunidad pa observa e operacionnan y conoce e diferente departamentonan a permiti Prome Minister Eman haya un imagen mas completo di e esfuersonan cu Defensa Hulandes y Wardacosta Caribe ta realisa diariamente.
Mescos cu e base militar na Savaneta, Aruba, base di Marina Real Parera ta forma parti di e infrastructura di Defensa Hulandes den Caribe. Mientras cu Savaneta ta hospeda diferente unidad militar, incluyendo Korps Mariniers y Arumil, Parera ta cumpli un papel central den coordinacion di e operacionnan di defensa y siguridad maritimo den region.
