Diaranson mainta, Prome Minister mr. Mike Eman, encarga cu e Plan Nacional di Reforestacion, a realisa un bishita di trabao na Santa Rosa, unda sra. Nathalie Maduro, directora di Santa Rosa, hunto cu su ekipo di trabao, a ricibi e prome mandatario y a duna un recorido amplio pa mustra e diferente area y proyecto cu ta den ehecucion.
Durante e bishita, miembronan di e ekipo di Santa Rosa a duna un splicacion amplio di e procesonan agricola y e reto pa logra cosecha exitoso den e clima calor di Aruba.
Santa Rosa ta e entidad gubernamental responsabel pa agricultura y cria di bestia na Aruba. E institucion ta brinda conseho tecnico y apoya agriculutornan, y tambe ta ofrece servicio di cria pa diferente tipo di bestia manera cabrito, carne, porco, baca y otro mas. Ademas, Santa Rosa ta cumpli un rol educativo, asistiendo criadonan di bestia pa por saca miho rendimiento for di nan bestianan.
Den su esfuerso pa promove sostenibilidad y innovacion, Santa Rosa ta pone den practica diferente metodonan pa cultivo di fruta y berdura, y tambe ta mantene su propio nursery, unda nan ta sembra y cria mata di diferente tipo.
Na final di e bishita, Nathalie Maduro a presenta na Prome Minister Mike Eman dos mata di lamunchi: uno local y e otro procedente di Colombia, como simbolo di cooperacion y intercambio di conocemento.
