Bou di aplauso, alegria, ambiente y colornan yamativo, a duna inicio na e temporada mas gusta di nos isla. Cu e fecha di 11-11 y na e orario di 11:11 am, dilanti tur invitado y sponsor a resona e jingle oficial di Carnaval pa asina yama C72 bonbini.
Premie Mike Eman como mandatario encarga cu Cultura a hiba palabra durante e ceremonia, caminda a felicita e organisacion di SMAC, MUSICA y tur cu ta activo den tene Carnaval di Aruba den halto.
A remarca riba e gran talento cu tin den nos comunidad, entre otro den arte, musica y den creatividad pero tambe a pone atencion riba un aspecto cu no semper ta resalta, cual ta e cooperacion di un comunidad henter, cu di un forma of otro ta aporta, pa haci algo grandi pa nos pais.
Un comunidad, cu den temporada di carnaval, ta forma un cooperacion di tur bario, tur club, tur organisacion y di cada ciudadano pa asina realsa nos Carnaval, expone e producto aki na mundo henter.
Prome Minister Eman a desea comunidad carnavalesco exito den nan preparacionnan y pa haci Carnaval di Aruba grandi, y tin e compromiso cu unda por como gobierno lo duna un man pa sostene e organisacionan cu ta haci di nos Carnaval uno special. Den tur aspecto, tanto creatividad, boluntarismo, talento, dedicacion y e sentido di orguyo pa bisa cu Aruba su Carnaval ta miho den mundo. Ban celebra nos Carnaval.
