Diahuebs 26 di juni, Prome Minister di Aruba, mr. Mike Eman, a tene un encuentro cu Embahador di India pa Panama y region, Dr. Sumit Seth, cu ta representa un nacion cu un comunidad fuerte y profundamente integra den Aruba.
Cada bez cu tin e oportunidad cu topa cu un dignitario cu ta representa un comunidad importante na Aruba, ta duna habri e oportunidad pa expresa aprecio pa e contribucion na nos pais. E comunidad di India na Aruba, cu a yega Aruba den transcurso di varios decada, ta un comunidad hopi activo den e mundo comercial, pero tambe den turismo, economia, y cuido medico, y a sa di duna un contribucion substancial na desaroyo di Aruba.
E reunion tabata enfoca riba fortalece e laso bilateral entre Aruba y India. Un di e temanan principal tabata colaboracion den area di educacion, unda Embahador Seth a ofrece beca pa studiantenan Arubano cu tin interes pa specialisa den areanan specifico. E embahador a compromete pa informa Gobierno di Aruba riba e sectornan educativo den cual India por brinda sosten.
Aruba ta actualmente den un etapa di desaroyo y modernisacion, y den e contexto ey, Prome Minister Eman a gradici e disponibilidad di India pa duna sosten den area di tecnologia, innovacion digital y infrastructura di conocemento.
Un otro punto relevante den e dialogo tabata e iniciativa di Prome Minister pa crea un sitio na Aruba na honor di Mahatma Gandhi, simbolo universal di pas, resistencia sin violencia y dignidad humano. E sitio aki lo sirbi tanto como homenahe na e legado humanista di Gandhi como un recordatorio di e contribucion y historia di e comunidad di India na nos isla.
Embahador Dr. Seth a gradici e hospitalidad brinda pa Gobierno di Aruba, y a enfatisa su deseo pa amplia e cooperacion den area di capacitacion, reforestacion, infrastructura digital y cyber tecnologia.
Gobierno di Aruba tin e compromiso pa sigui traha pa un relacion duradero, constructivo y solidario cu India, reconociendo e balor di e comunidad di India na Aruba como un pilar importante den nos desaroyo nacional.
