Diabierna atardi, Prome Minister Mike Eman a participa brevemente na e Relatievaartdag organisa door di Marina Real Hulandes abordo di Zr.Ms. Friesland, cu tabata mara na Waf di Playa, Oranjestad. Hunto cu varios dignatario y personahe di nos isla, incluyendo Su Excelencia Gobernador di Aruba, Alfonso Boekhoudt, y Comandante di Forsanan Arma di Hulanda (Commandant der Strijdkrachten), General Onno Eichelsheim, a haya oportunidad pa nevega rond di Aruba y conoce di cerca e operacionnan di Marina Real durante un recorido abordo di e bapor. Wardacosta tambe tabata presente y a presenta diferente demostracion pa e invitadonan, brindando un impresion di e trabou cu ta wordo realisa pa garantisa siguridad maritimo den nos region. Prome Minister Mike Eman a saluda tur abordo prome cu e bapor a sali pa haci su recorido.
Zr.Ms. Friesland ta un bapor di patruya di 108 meter largo, perteneciente na e clase Holland di Marina Real Hulandes, cu a drenta servicio na 2013. E bapor ta ekipa cu tecnologia moderno pa vigilancia maritimo y ta cumpli cu tareanan importante, entre otro combate di trafico di droga, vigilancia di awanan y sosten na operacionnan humanitario. Na september di e aña aki, Friesland a regresa den Caribe Hulandes pa asumi su tareanan di patruya, despues di a opera durante aproximadamente cuater luna den region mas trempan e aña aki. Su presencia ta contribui na siguridad maritimo y cooperacion cu Wardacosta den Caribe Hulandes.
E Relatievaartdag ta brinda un oportunidad pa fortalece e relacion entre Marina Real, autoridadnan y comunidad di Aruba, mientras cu e ta duna un miho comprendemento di e trabou cu ta wordo haci pa proteha nos region.
