E Accion di Bario cu a tuma luga diahuebs mainta na Rooi Afo y Seroe Preto a pone enfasis riba limpiesa, produccion local y fortalece e balornan di nos comunidad. Durante e accion, Prome Minister mr. Mike Eman a bishita diferente iniciativa y organisacion den e bario pa conoce di cerca e necesidadnan y e esfuersonan positivo cu ta contribui na bienestar di nos hendenan.
E mainta a habri cu un reconocemento unda Robert Maduro a ricibi un homenahe pa su aporte den nos musica y cultura. Na cas di señora Henrika Boekhoudt Prome minister Mike Eman a duna Robert Maduro un plakaat memey aplauso di varios colega y su amistadnan. Pa hopi decada caba Robert Maduro ta un bon amigo di cas pa famia Boekhoudt. Sra. Boekhoudt tabata hopi honra pa a brinda su cas como luga pa Robert Maduro ricibi su homenahe y a comparti un rato tambe cu Prome Minister Mike Eman durante e di 12 edicion di Accion di Bario pa 2026.
Un di e resultadonan mas notabel tabata e accion di limpiesa coordina pa Serlimar y Bureau City Inspector. Durante e accion a logra colecta hopi sushi. E resultado aki ta confirma e necesidad cu tin den comunidad pa mas facilidad y accion cu ta contribui na mantene nos barionan limpi y miho cuida.
Durante su recorido, Prome Minister Eman a bishita tambe un agricultor y un productor di honing unda a haya informacion tocante produccion local di patia y e importancia di abehanan pa nos naturalesa. E iniciativa nan aki ta mustra con produccion local di fruta cu berdura y cuido di naturalesa por bay man den man pa fortalece Aruba su resiliencia y sostenibilidad.
Como parti di e accion, Prome Minister a bishita igualmente Fundacion Centro Famia Piedra Plat. Durante e encuentro, el a conoce di cerca e diferente programa cu ta uni nos generacionnan, fortalece famia y promove participacion activo den comunidad. E bishita a inclui un encuentro cu nos grandinanan y un recorido den e facilidadnan di e fundacion.
Accion di Bario ta un manera efectivo pa gobierno mantene contacto directo cu nos hendenan, ta tende di nan preocupacionnan y ta traha hunto riba solucion concreto pa mehora calidad di bida den nos barionan. Esaki ta muestra cu gobierno, comunidad y sector priva por traha hunto pa logra resultado positivo na beneficio di nos pueblo.
