Diamars atardi a tuma luga e ceremonia oficial di traspaso di Cas Veneranda, un edificio historico situa na Wilhelminastraat 7, restaura completamente como parti di un esfuerso conhunto pa preservacion di patrimonio cultural di Aruba.
E evento a marca e culminacion oficial di e proyecto di restauracion, realisa den cooperacion entre Gobierno di Aruba y Monumentenfonds Aruba, como parti di un vision mas amplio pa revitalisa centro di Oranjestad.
E ceremonia a cuminsa cu palabra di bonbini door di maestro di ceremonia Edjean Semeleer, kende a guia e programa oficial di e anochi. Durante e apertura, invitadonan a wordo introduci na e significado di e proyecto y su impacto riba preservacion di patrimonio.
Posteriormente, representante di Monumentenfonds Aruba, Anne Witsenburg, a comparti detaye riba e proceso di restauracion y e importancia di conserva edificionan historico pa generacionnan futuro. E programa a continua cu un presentacion audiovisual cu a mustra e transformacion di Cas Veneranda, ilustrando e diferente etapa di restauracion.
Representante di familia, Landa Merryweather, a comparti reflexion emotivo riba e significado di e propiedad pa e famia Arends y su legado den historia di Aruba, resaltando e balor sentimental di e edificio.
Den su discurso, Prome Minister Mike Eman a describi e momento como “un anochi di hopi emocion”, resaltando cu Cas Veneranda no ta solamente un edificio, pero un refleho bibo di e historia di Aruba.
Eman a subraya cu e area rond di e edificio ta forma un nucleo historico importante, unda pioneronan di Aruba a biba, traha y contribui na desaroyo di e pais. “Aki a biba e prome mediconan di Aruba, aki a nace comercio, aki a forma parti di educacion y gobernacion di nos pais,” el a indica.
E Prome Minister a pone enfasis riba e importancia di continuidad den e esfuerso di restauracion, resaltando cu e tipo di proyecto aki ta rekeri compromiso di largo plaso y colaboracion entre sector publico, experto y sector priva. Tambe a destaca cu e restauracion ta forma parti di un vision mas amplio pa crea un centro urbano unda historia y identidad ta visibel pa tur, incluyendo bishitantenan.
“Si nos kier cu futuro generacionnan y turistanan compronde ken nos ta como pueblo, nan mester por mira, sinti y experencia nos historia,” Eman a expresa.
Ademas, e Prome Minister a anuncia cu e esfuerso di restauracion lo continua cu otro monumentonan importante, incluyendo Willem III Toren y Fort Zoutman, como parti di un plan integral pa revitalisa Oranjestad.
Di su parti, Ministro Geoffrey Wever a destaca e proceso largo cu a precede e restauracion, señalando cu Cas Veneranda anteriormente tabata den un estado deplorabel y cu e decision pa restaura a wordo tuma como prioridad den e plan di revitalisacion di Oranjestad.
Wever a enfatisa cu e proyecto tabata posibel danki na perseverancia, colaboracion y confiansa entre gobierno, sector priva y famia Arends. El a destaca cu, a pesar di limitacionnan financiero durante un periodo desafiante, a logra yega na un modelo financiero realistico cu a haci posibel e compra y restauracion di e edificio, cu apoyo di institucionnan manera APFA y Nationaal Restauratiefonds.
E Minister a pone enfasis riba e amplio colaboracion interdepartamental cu a haci e proyecto posibel, incluyendo aporte di departamento di asuntonan huridico, finansas, DOW, FIB, DMN y Departamento di Cultura. Segun Wever, e tipo di coordinacion aki ta un ehempel di con Gobierno por traha como un solo ekipo pa logra un meta comun.
“Revitalisacion di Oranjestad no ta trabou di un solo ministerio, sino di henter Gobierno trahando hunto,” Wever a indica.
Segun e Minister, Cas Veneranda ta un ehempel concreto di e vision aki: un centro urbano vibrante caminda a inclui patrimonio, actividad economico y presencia di gobierno. El a anuncia cu Departamento di Asuntonan Economico lo ocupa e edificio, sigurando uzo activo y continuo den e area.
Ademas, e edificio lo integra un restaurant y espacio pa reunion, pa asina habri e porta pa comunidad y sector priva. “E edificio aki no tabata destina pa keda cera. Nos kier cu comunidad por gosa di dje, unda historia y futuro por encontra otro,” Wever a expresa.
Tambe a destaca cu Cas Veneranda a wordo ekipa cu tecnologia sostenibel pa reduci consumo di energia y awa, manera tambe facilidad pa vehiculo electrico, posicionando e como un edificio moderno cu respet pa medio ambiente.
Durante e acto simbolico, a haci entrega di regalo na representantenan clave di e proyecto, incluyendo Johnathan Upegui, Nathaly de Mey y Landa Merryweather. E ceremonia a culmina cu cortamento oficial di sinta y un momento di potret, marcando formalmente e traspaso di e edificio.
Despues di e ceremonia, invitadonan a participa den un momento di encuentro y festeho, unda nan a haya oportunidad pa bishita e edificio restaura y aprecia su diseño y restauracion.
Cu e restauracion di Cas Veneranda, Aruba no solamente a rescata un edificio historico, pero tambe un capitulo esencial di su identidad como pueblo, consolidando un paso firme den revitalisacion di su capital.
