Prome Minister Mike Eman, hunto cu Minister di Finansa, Asuntonan Economico y Sector Primario, Geoffrey Wever, y director di Stichting Monumentenfonds Aruba, Petra Davis, a marca e inicio oficial di e prome fase di trabou di restauracion di e edificio historico John G. Eman Bank, situa na Caya Grandi den centro di Oranjestad. Durante e acto, Prome Minister Mike Eman a destaca cu e restauracion di e edificio aki ta representa mucho mas cu solamente restauracion di un monumento historico. E proyecto ta forma parti di un vision mas amplio pa revitalisa centro di Oranjestad, conserva e identidad di Aruba y bolbe trece actividad economico den centro di ciudad.
Prome Minister Eman a enfatisa cu e edificionan historico di Caya Grandi tin un balor special pa Aruba, pasobra nan ta conta e historia di nos desaroyo como pais. Segun Eman, centro di Oranjestad tin un identidad propio cu ta distingui di otro areanan comercial moderno. Mientras cu tin centro comercial ta ofrece facilidad moderno, e edificionan historico di Oranjestad ta representa nos herencia, nos cultura y e historia di varios generacion cu a contribui na desaroyo di Aruba. Den e contexto aki, Prome Minister Eman a recorda un y tur presente e importancia historico di John G. Eman, un pionero den sector financiero y economico di Aruba. Na 1925, den un periodo cu economia di Aruba tabata cambiando cu establecimento di e refineria riba nos isla, John G. Eman a funda e prome banco di Aruba. E iniciativa aki a contribui na desaroyo di actividad economico y financiero di nos pais. E edificio cu pa hopi aña tabata sede principal di Aruba Bank ta representa un parti importante di e historia aki. Cu su restauracion, e monumento lo haya un funcion nobo, mientras cu su caracter historico lo keda conserva.
Prome Minister Eman a dedica palabranan di reconocimento na Minister Geoffrey Wever, kende durante añanan a sigui impulsa proyectonan pa revitalisa centro di Oranjestad, combinando restauracion di monumentonan cu desaroyo economico. Eman a destaca e continuidad di e esfuersonan aki, cu ta permiti pa proyectonan prepara anteriormente awor yega na nan fase di ehecucion. Eman a expresa tambe su aprecio pa e trabou di Stichting Monumentenfonds Aruba, Monumentenbureau, e arquitectonan y tur e instancianan cu ta contribui na conservacion di e patrimonio historico di Aruba.
Un edificio historico cu un funcion nobo
Minister Geoffrey Wever a remarca cu restauracion di edificio John G. Eman Bank ta parti di un programa mas amplio pa revitalisa centro di Oranjestad. El a menciona cu tin diferente edificio grandi abandona den centro di ciudad, cu anteriormente tabatin un funcion importante den economia di Aruba.
Pa Minister Wever, no ta suficiente pa solamente restaura un edificio historico. Ta importante tambe pa duna e edificio un funcion sostenibel, cu ta garantisa uzo y actividad den futuro. Den caso di John G. Eman Bank, Centraal Bureau voor de Statistiek (CBS) y Sociaal-Economische Raad (SER) lo establece nan oficinanan den e edificio despues di su restauracion. Ademas, e proyecto ta inclui un espacio pa un cafe of resutraunt y algun apartamento. E combinacion di oficina, actividad comercial y vivienda ta forma parti di e concepto cu Minister Wever ta promove pa centro di Oranjestad. E meta ta pa trece mas hende bek den centro di ciudad, stimula actividad economico y crea un ambiente cu ta bibo durante diferente momento di dia. Minister Wever a destaca cu e adkisicion di e edificio y e preparacionnan pa su restauracion a bira posible danki na cooperacion entre Aruba Bank, Stichting Monumentenfonds Aruba, Nationaal Restauratiefonds di Hulanda y Gobierno di Aruba. Aruba Bank a coopera den e transaccion pa traspasa e propiedad, mientras cu Nationaal Restauratiefonds a contribui cu e facilidadnan di financiamento. Gobierno di Aruba, cu sosten di Conseho di Minister y aprobacion di Parlamento, a pone fondo disponibel pa haci e adkisicion posibel Minister Wever a expresa su agradecimento na tur e organisacionnan envolvi, specialmente Stichting Monumentenfonds Aruba y su director Petra Davis, pa e trabou di preparacion y coordinacion cu a permiti pa e proyecto yega na e fase actual.
Petra Davis: Inicio di trabou fisico despues di un proceso largo di preparacion
Director di Stichting Monumentenfonds Aruba, Petra Davis, a explica cu e inicio di e trabounan fisico ta resultado di hopi aña di preparacion, negociacion y cooperacion entre diferente partner. For di decembe aña pasa Stichting Monumentenfonds Aruba a bira propietario oficial di e edificio John G. Eman Bank. Desde e momento ey, e organisacion a sigui cu e preparacionnan tecnico y administrativo pa por cuminsa cu su restauracion.
Dia 22 di juli 2026 a finalisa e proceso di seleccion di arkitecto, cu Bert Kamsteeg di BK Consult como arkitecto di e proyecto. Dia 2 di october, a tene e destaho pa e prome fase di trabou, cu D&C Partners selecciona como contratista. Davis a explica cu e prome fase ta consisti di desmantelacion cuidadoso di e partinan cu no tin un balor monumental. E trabou aki mester wordo realisa cu precision y respet pa conserva e elementonan historico cu ta duna e edificio su identidad y balor cultural. Davis a anuncia tambe cu Monumentenfonds ta den fase final di negociacion pa cera un contracto cu un huurdo pa e cafe/restaurant y algun apartament cu lo forma parti di e edificio.
Conserva historia y trece bida bek na Caya Grandi
Cu restauracion di John G. Eman Bank, un edificio cu durante hopi aña a keda sin uzo lo haya un destino nobo den centro di Oranjestad.
E proyecto ta combina conservacion di patrimonio historico cu actividad economico, facilidad di oficina y vivienda. Asina e edificio no solamente lo recupera su balor arkitectonico, pero tambe lo bolbe forma parti activo di bida cotidiano di e ciudad.
Pa Prome Minister Mike Eman, e tipo di proyecto aki ta esencial pa conserva e identidad di Oranjestad y pa crea un centro di ciudad cu ta atractivo tanto pa nos comunidad como pa nos bishitantenan.
E inicio di e trabounan na John G. Eman Bank ta marca un siguiente paso concreto den e esfuersonan pa revitalisa Caya Grandi, proteha e historia di Aruba y duna su edificionan historico un funcion nobo pa e futuro generacionnan.
