E concierto di Leerorkest Aruba a reuni dialuna mainta mas di 600 mucha di seis scol riba stage na Renaissance Convention Center. E evento a mustra e poder di enseñansa y musica como tambe e talento extraordinario cu nos muchanan a desaroya durante e ultimo aña escolar. Actualmente, Leerorkest Aruba ta atende como 620 mucha den su programa escolar y aproximadamente 100 mucha adicional den su programa despues di scol, brindando acceso na les di musica na centenares di mucha na Aruba. Prome Minister mr. Mike Eman hunto cu vice-premier mr. Gerlien Croes tabata presente durante e presentacion pa aprecia personalmente e resultado di e iniciativa educativo y cultural importante cu ta impactando nos muchanan na Aruba.
Juliette van Romondt, coordinador di Leerorkest Aruba, a expresa su gran satisfaccion cu e resultado di e evento. Tur cos a bay sumamente bon. “Mi ta hopi orguyoso di e muchanan, e docentenan y tur persona cu a contribui pa haci e proyecto aki un exito. Nos a haya hopi sosten di e sponsornan y comunidad, cu a yuda haci e evento aki posibel.”
Entre e scolnan participante tabatin St. Paulus School, cu a participa cu mas di 150 alumno for di klas 3 te cu klas 6. Eltienne Yarzagaray, docente di 6de klas na St. Paulus School, a comparti su orguyo pa e participacion di su alumnonan. “E muchanan a haci un tremendo trabou awe. Leerorkest ta brinda nan un oportunidad unico pa experimenta cu musica y siña toca un instrumento musical. Pa hopi mucha, esaki ta nan prome contacto cu un instrumento musical. Si nos kier inverti den prevencion y guia nos muchanan riba un bon caminda, musica y arte por hunga un rol hopi importante den desaroyo di nan creatividad y disciplina. Mi ta kere cu e iniciativa di Leerorkest mester sigui crece y yega na aun mas scolnan na Aruba.”
Patrick de Heus, director musical di Leerorkest Aruba, a enfatisa e impacto positivo cu e programa tin riba e desaroyo di nos muchanan. “E concierto a bai hopi bon. Nos a mira hopi energia, nos muchanan contento, docentenan contento, e mayornan contento y e famianan orguyoso. E muchanan a toca extraordinariamente bon awe. Nos a practica hunto durante e ultimo siman, pero e resultado di awe a supera nos expectativa.
E entusiasmo, e cooperacion y e alegria cu bo ta mira entre e muchanan ta mustra con importante e proyecto aki ta. Leerorkest mester continua, pasobra musica ta uni hende. Ora bo ta toca musica, bo no ta hacie bo so, bo ta hacie hunto cu otro. Esaki ta un experiencia cu ta yuda muchanan desaroya talento, disciplina y trabou den ekipo.
De Heus tambe a expresa su satisfaccion cu e presencia di Prome Minister Mike Eman durante e concierto. “Mi ta hopi contento cu Prome Minister Mike Eman tabata presente den e sala awe. Ta importante cu e lidernan di nos pais por mira cu nan mesun wowo e impacto cu e proyecto aki tin riba nos muchanan. Ora bo mira e alegria, e entusiasmo y e progreso cu musica ta trece den nan bida, bo por comprende realmente e balor di e iniciativa aki. E sosten di comunidad, e sponsornan y liderato ta fundamental pa sigui haci programa manera esaki posibel.”
E presentacion a culmina cu un concierto espectacular den cual tur e muchanan a toca hunto, creando un momento emocionante cu a provoca aplauso prolonga di e famianan, e docentenan y invitadonan presente. UNOCA ta orguyoso di por forma parti di e bunita proyecto aki. Aña pasa Gobierno di Aruba a inaugura un scol di musica den bario yama Porta pa Harmonia. Leerorkest Aruba ta un iniciativa cu ta mustra ora bo inverti den enseñansa musical bo ta inverti den Aruba su futuro, brindando nos muchanan oportunidad pa desaroya talento, confiansa propio, disciplina y creatividad, mientras ta siña e balor di colaboracion y compromiso.
