Prome Minister Mike Eman, hunto cu embahador di Reino Hulandes na Peru, Alexander Kofman, a reuni cu presidenta electo Keiko Fujimori na Palacio Torre Tagle na Lima. E audiencia a tuma luga na bispo di e instalacion oficial di Fujimori como presidenta di Republica di Peru. Durante e encuentro, nan a papia riba e relacion entre Reino Hulandes y Peru, cu atencion special pa e lasonan entre Aruba y Peru. E delegacion a conta cu presencia tambe di Secretario General di Ministerio di Asunto General Robert Candelaria, Director interino di Departamento di Relacionan Exterior (DBB) Juri Nicolas y Hefe di Prensa di Gabinete AVP-Futuro Marko Espinoza.
Na salida di Palacio Torre Tagle, Prome Minister Eman a califica e combersacion como agradabel y productivo. “Hunto cu embahador di Reino aki na Peru nos a bishita presidenta electo Fujimori. Tabata un combersacion agradabel. Nos a papia riba e temanan cu ta importante pa e relacion entre Reino Hulandes y Peru, y naturalmente tambe pa e relacion entre Aruba y Peru”, Eman a declara.
Oportunidad nobo pa cooperacion
Durante e audiencia, e delegacion a trata diferente area den cual tin posibilidad pa amplia cooperacion, entre otro maneho di awa, seguridad, desaroyo economico y agricultura. Prome Minister Eman a destaca cu Reino Hulandes ta mira hopi oportunidad pa fortalece su relacion cu Peru. Aruba por hunga un papel importante den e acercamento aki, teniendo cuenta cu su posicion den Caribe y e lazonan cu ya ta existi cu Peru. “Nos a usa e momento aki pa fortalece e relacionnan y presenta perspectiva nobo y cla pa futuro. Tabata un combersacion hopi productivo”, Eman a bisa.
Un di e posibilidadnan menciona durante e reunion ta establecimiento di Wageningen University & Research na Aruba. Segun Prome Minister Eman, un presencia di Wageningen na Aruba eventualmente por brinda sosten tecnico na proyectonan y desaroyonan na Peru. Esaki por crea un situacion beneficioso pa Reino Hulandes, Aruba y Peru, especialmente den area relaciona cu agricultura, produccion di alimento, sostenibilidad y maneho di awa.
Turismo y comunidad peruano na Aruba
Crecemento di turismo for di Peru pa Aruba tambe a forma parti di e combersacion. Cada bes mas turista peruano ta bishita nos isla, loke ta fortalece contacto entre ambos pueblo y ta crea oportunidad nobo pa sector turistico y comercial. Prome Minister Eman a papia tambe riba e comunidad peruano na Aruba y e contribucion importante cu su miembronan ta duna na desaroyo di nos pais.
“Presidenta electo Fujimori ta consciente cu Aruba tin un comunidad peruano cu ta sigui desaroyo di nos isla cu hopi atencion y cu ta contribui activamente na nos progreso. Nos a comparti e calor y simpatia cu tin entre nos, cu e deseo pa traha hunto na un futuro mihor pa nos pueblonan”, Eman a declara na Spaño.
Reino Hulandes presente den Caribe
Embahador Alexander Kofman a destaca importancia di presencia di Prome Minister Eman na e encuentro. Segun e embahador, esaki ta manda un señal cla cu Reino Hulandes ta presente tanto na Europa como den Caribe. “Tabata hopi bon pa tin Prome Minister aki pa transmiti e mensahe. Cu esaki nos ta mustra claramente cu Reino ta presente na Europa, pero tambe aki den Caribe”, Kofman a declara.
E embahador a elogia tambe e hecho cu Prome Minister Eman a conduci e combersacion cu Fujimori na Spaño. Segun Kofman, uso di idioma a crea mas cercania y a fortalece e contacto personal durante e audiencia. Prome Minister Eman, na su turno, a expresa aprecio pa e manera profesional cu Reino Hulandes ta representa na Peru. E a destaca conocemento amplio di embahador Kofman y e sosten brinda pa tanto e personal di embahada como e delegacion di Aruba.
Presidente Keiko Fujimori
Keiko Sofia Fujimori Higuchi a nace dia 25 di mei 1975 na Lima. E ta lider di partido Fuerza Popular y yiu di anterior presidente peruano Alberto Fujimori, kende a goberna Peru di 1990 pa 2000. Keiko Fujimori a sirbi como congresista di 2006 pa 2011 y a campaña varios biaha pa presidencia di Peru. Den eleccion presidencial di 2026, el a sali victorioso den e di dos ronde cu 50,135 porciento di e votonan valido. E autoridad electoral peruano a proclame oficialmente como presidentaeelecto pa e periodo 2026-2031. Cu su huramentacion dia 28 di juli, Keiko Fujimori lo bira e prome muhe eligi pa goberna Republica di Peru.
Peru como mercado turistico pa Aruba
Peru ta un mercado turistico estableci y importante pa Aruba. Segun cifranan di Aruba Toursim Authority (ATA) durante e prome seis lunanan di 2026, Aruba a ricibi 10.296 bishitante for di Peru. Esaki ta representa un crecemento di 3,3 porciento compara cu 9.966 bishitante den e mesun periodo di 2025. Conectividad aereo directo entre Lima y Aruba ta hunga un papel importante den e desaroyo di e mercado aki. Actualmente LATAM Airlines ta opera shete buelo pa siman, cu un total di 65.960 asiento disponibel y un ocupacion promedio di 88 porciento. Esaki ta un di e porcentahenan di ocupacion mas halto entre e rutanan di LATAM pa Aruba. Ta proyecta cu for di october 2026 e cantidad di buelo lo subi di shete pa dies pa siman, loke lo amplia conectividad no solamente cu Peru, sino tambe cu otro mercado den e region zuid di Sur America.
Participacion di Aruba na e instalacion presidencial ta subraya e importancia di Peru como socio den region. E bishita ta crea oportunidad pa fortalece e lasonan diplomatico y duna un impulso nobo na cooperacion den tereno di comercio, agricultura, turismo y sostenibilidad.
