Durante su bishita oficial na Sint Eustatius pa conmemoracion di 250 aña di First Salute, Prome Minister Mike Eman a aprovecha e oportunidad pa reuni cu un grupo di habitantenan cu tin un conexion special cu Aruba. E encuentro na The Lions Den a reuni personanan cu a nace, biba, traha of studia na Aruba, y cu ainda ta conserva recuerdonan y lasonan profundo cu nos isla. E reunion a brinda Prome Minister Eman e oportunidad pa intercambia experiencia cu e comunidad, comparti informacion tocante e desaroyonan actual na Aruba y scucha e recuerdonan di personanan cu tin un historia comparti entre e dos islanan.
Pa Prome Minister Eman, e contacto cu e comunidad di Sint Eustatius tabata un di e momentonan mas emocionante di su bishita. “Ta gara bo curason pa mira cuanto sentimiento tin pa Aruba aki na Sint Eustatius”, Eman a declara. Segun e Prome Minister, practicamente tur persona cu e ta topa na Sint Eustatius tin un historia cu Aruba. Algun a nace na Aruba, otro a sigui enseñansa na nos isla, mientras cu tin tambe hopi cu nan mayornan a traha of biba na Aruba durante diferente periodo.
Aruba a hunga un papel importante den formacion di hopi habitante di Sint Eustatius
Luciano Milliard, docente na Universidad di Aruba, cu ambos su mayornan a nace na Sint Eustatius, a explica cu e conexion entre e dos islanan ta bay mucho mas leu cu lasonan familiar. Milliard, cu tambe ta forma parti di e organismo di supervision di Statia Utilities Company (STUCO), a participa na e encuentro na The Lions Den. Tin un grupo grandi di habitantenan di Sint Eustatius cu a nace, biba of studia na Aruba, incluyendo personanan cu actualmente ta ocupa posicionnan importante den comunidad y gobierno insular. Milliard a menciona scolnan manera Colegio Arubano, Abraham de Veerschool, John Wesley College y diferente scolnan di enseñansa secundario y tecnico, unda hopi habitante di Sint Eustatius a sigui nan formacion. E lasonan educativo aki a contribui na un conexion duradero entre e dos islanan, especialmente den e generacionnan cu a studia na Aruba durante e tempo di Antiyas Hulandes. “Antiyas no ta existi mas. Aruba tin su Status Aparte 40 aña pasa, pero ainda bo ta mira e lasonan entre nos islanan, nos islanan Hulandes den Caribe”, Milliard a expresa. Segun Milliard, e encuentro a brinda Prome Minister Eman tambe e oportunidad pa despedi di e comunidad den su calidad di Prome Minister, mirando cu su periodo na cabes di Gobierno di Aruba ta acercando su final.
Recuerdonan special di San Nicolas
Entre e personanan cu Prome Minister Eman a topa tabata Diana Windefelde, cu anteriormente a biba na Aruba, den e area di Johanna Morto, y a sigui enseñansa na Maria Regina. Actualmente Windefelde ta biba na Sint Maarten, pero e ta bishita Sint Eustatius di tempo en tempo. Pa dje, e encuentro cu Prome Minister Eman tabata un oportunidad pa tende directamente tocante e desaroyonan cu ta tuma luga na Aruba. Windefelde a expresa su satisfaccion cu e informacion cu Eman a comparti, particularmente tocante e esfuersonan pa mehora y revitalisa San Nicolas. Windefelde a indica cu e ta orguyoso di tende cuanto Aruba a progresa, especialmente cu e trabounan cu actualmente ta tomando luga pa mehora San Nicolas. E reaccion di Windefelde ta un ehempel di con e desaroyonan na Aruba ta sigui siendo importante pa personanan cu a laga nos isla hopi aña pasa, pero cu ainda ta sinti un conexion fuerte cu e luganan unda nan a crece y studia.
Olton Berkel: un conexion cu ta continua despues di decada
Olton Berkel, otro participante na e encuentro, a nace na Aruba, a crece na Sint Eustatius y a regresa Aruba pa sigui su enseñansa secundario. Despues el a continua su estudio na Hulanda cu un beurs di Aruba. Berkel ta biba bek na Sint Eustatius pa aproximadamente 20 aña caba y a comparti cu esaki no ta e prome biaha cu e ta topa Prome Minister Eman. Segun Berkel, nan prome encuentro tabata rond di 2010 of 2011, ora cu Eman a bishita Sint Eustatius y Berkel tabata presidente di e asociacion Arubiano na e isla. Posteriormente, Berkel a bishita Prome Minister Eman na su oficina na Aruba. E encuentro di dialuna tabata e di tres oportunidad cu e dos a topa otro. Berkel a expresa su aprecio pa e intercambio di informacion y e ambiente trankilo durante e reunion. Prome Minister Eman a comparti informacion tocante e desaroyonan na Aruba, cu atencion special pa San Nicolas, considerando cu hopi habitante di Sint Eustatius tin nan origen familiar of historico relaciona cu e parti aki di Aruba. Berkel a describi e encuentro como un intercambio agradabel, den cual e participantenan a haya oportunidad pa papia directamente cu Prome Minister Eman y conoce mas tocante e situacion actual di Aruba.
Julian Woodley ta destaca progreso y retonan comparti
Un otro participante na e reunion tabata Julian Woodley, un figura cu tin un trayectoria amplio den servicio publico na Sint Eustatius. Woodley a ocupa anteriormente e posicionnan di miembro di Conseho Insular, representante interino di Gobierno Hulandes y gobernador interino. Actualmente e ta pensionado. Woodley, cu tambe a sigui enseñansa na Aruba, a probecha e encuentro pa intercambia recuerdonan cu Prome Minister Eman, kende e ta conoce desde hopi aña. Den su entrevista, Woodley a reflexiona riba e cambionan cu Sint Eustatius a experimenta desde 10 di october 2010. E isla a mira progreso den diferente area, incluyendo infrastructura, construccion di camindanan, enseñansa y acceso na cuido medico. Sin embargo, el a reconoce cu ainda tin retonan, particularmente den e sector di vivienda y tambe riba costo di bida.
Sint Eustatius ta recorda Aruba di antes
Durante su declaracion, Prome Minister Mike Eman a comparti tambe e sentimiento di nostalgia cu su bishita na Sint Eustatius a desperta den dje. Segun Eman, ora cu e ta pasa den diferente barrio na Sint Eustatius, e ta reconoce hopi aspecto di Aruba di antes. E trankilidad, e convivencia entre bisinjanan y e conexion fuerte entre famianan ta record’e e ambiente cu tabata caracteriza Aruba durante decada pasa. Eman a destaca cu e lasonan entre e dos islanan ta existi tambe via diferente comunidadnan religioso, incluyendo Methodist Church y Seventh-day Adventist Church. Segun dje, tin personanan cu a biba na Aruba 30 of 40 aña pasa, pero cu ainda ta papia di nan experiencia na nos isla cu un sentimiento profundo, manera cu nan tabata na Aruba ayera.
Un encuentro cu ta confirma e lasonan entre e dos islanan
E reunion na The Lions Den a demonstra cu, apesar di paso di tempo y e cambionan constitucional den Reino Hulandes, e conexion humano entre Aruba y Sint Eustatius ta continua fuerte. E experiencianan comparti door di Luciano Milliard, Diana Windefelde, Olton Berkel y Julian Woodley ta ilustra e diferente maneranan cu Aruba a forma parti di bida di habitantenan di Sint Eustatius, sea pa medio di famia, enseñansa, trabou of participacion den comunidad. Pa Prome Minister Mike Eman, e encuentro tabata un oportunidad pa reconoce personalmente e lasonan aki y comparti un momento special cu personanan cu ainda ta conserva un afecto profundo pa Aruba. Eman a describi Sint Eustatius como un luga cu ta desperta un sentimiento di familiaridad y cercania. “Un luga cu ta manera un segundo cas, sigur, sigur pa nos tambe”, Prome Minister Eman a expresa.






















