Diamars atardi, den un acto simbolico di union, cooperacion regional y compromiso cu sostenibilidad, Prome Minister di Aruba, mr. Mike Eman, hunto cu Consul di Colombia na Aruba, Sr. Gustavo Serrano Amaya, Embahadora di Colombia na Hulanda, Sra. Carolina Olarte Bácares, Capitan di e Buque ARC Gloria di Fuerza Naval Colombiano, Jorge Gonzalez, y 40 cadet di e buque Gloria a contribui na e vision ambicioso di Gobierno di Aruba: reforestacion di nos isla.
Como muestra di hermandad y como homenahe na e simbolismo profundo di mata como fuente di bida, di inversion den futuro, di unidad y cooperacion, di resiliencia y crecemento, e cadetnan hunto cu Prome Minister Eman a planta un total di 12 mata na Plaza del Cóndor, dilanti di Price Smart. E acto ta representa no solamente un paso fisico pa un Aruba mas berde, sino tambe un mensaje profundo di speransa, renobacion y union entre e pueblonan cu ta parti di un futuro comun.
Cada mata planta ta un simbolo di speransa, di futuro y di un compromiso sostenibel. Prome Minister a gradici e delegacion Colombiano pa nan compromiso, y ta honra pa conta cu nan contribucion pa e causa noble aki.
Prome Minister a expresa su profundo gratitud na Embahadora Bácares pa su bishita y sosten continuo, y tambe na Capitan Gonzalez y tur cadet cu a contribui den logra e meta pa yega na un Aruba mas berde, bunita y sostenibel.
