Dialuna merdia Prome Minister, mr. Mike Eman hunto cu Minister di Finansa, Asunto Economico y Sector Primario, mr. Geoffrey Wever a bishita e proyecto di renobacion di Cas Veneranda na Wilhelminastraat. E edificio historico ta den proceso di un renobacion completo cu lo duna un bida nobo na un simbolo cultural y urbano di nos pais.
E proyecto di renobacion di Cas Veneranda ta un pieza clave den vision di Gobierno pa revitalisa Oranjestad. Cu preservacion di e patrimonio cultural y un adaptacion moderno, Cas Veneranda lo bira un hub multifuncional: un espacio pa actividadnan cultural, reunion, comercio y uso gubernamental.
Minister Geoffrey Wever a expresa cu: “Revitalisacion di Oranjestad ta un eje central den nos plan pa stimula actividad economico, crea mas oportunidad pa MKB y mehora calidad di bida pa nos ciudadanonan. Cas Veneranda ta simbolisa un Oranjestad cu ta renoba su cara pero mantene su alma historico.”
Un proyecto cu orguyo y simbolismo
Cas Veneranda no ta un edificio cualkier. E ta un monumento carga di historia y emocion, cu ta refleha identidad di nos comunidad. Desde su prome dia como minister, Geoffrey Wever a pone restauracion di e edificio histórico aki como un prioridad personal.
Colaboracion y proposito nobo
E proyecto a bira posibel gracias na cooperacion publico-priva, cu participacion di SMFA, APFA, NRF (Nationaal Restauratie Fonds) y Gobierno di Aruba. E restauracion ta un ehempel concreto di kico por logra ora Aruba y Hulanda traha hunto den confiansa y cu mesun vision.
Parti di un vision mas amplio
Restauracion di Cas Veneranda ta integra den un plan mas amplio pa revitalisa Oranjestad, unda cu mas edificionan historico ta ricibi un proposito nobo. Un ehempel ta e restauracion di e ex-Oficina di Ministerio Publico (Ex-OM), unda Gobierno y FCCA ta traha hunto pa converti un edificio abandona den vivienda pa studiante. Esakinan ta pasonan concreto pa duna bida nobo na nos centro urbano y pa stimula un dinamica social y economico nobo.
Impacto positivo riba centro urbano
Minister Wever a subraya cu trece departamentonan di gobierno den centro di ciudad lo crea un fluho diario di hende y actividad den centro di ciudad, cu lo genera mas movimiento y beneficio pa negoshinan local. Cas Veneranda lo bira un motor di actividad, un simbolo di renobacion y un punto di encuentro pa generacionan presente y futuro.
Compromiso pa futuro
Cu e proyecto di Cas Veneranda, Gobierno ta demostra cu palabra ta sigui cu accion. Revitalisacion di Oranjestad ta un meta firme den “Programa di Gobernacion AVP-FUTURO 2025-2028”, y e resultadonan ta demostra claridad di liderazgo y compromiso firme pa transforma nos capital den un centro moderno, vibrante y inclusivo.
Minister Geoffrey Wever a conclui: “Nos por logra esaki solamente si nos traha hunto. Revitalisacion di Oranjestad ta un esfuerzo colectivo pa crea oportunidad, fortifica nos identidad y stimula nos economia. Cas Veneranda ta prueba cu un vision claro y un cooperacion sincero ta trece bida nobo den nos ciudad.”
Cu e esfuerzo aki, Gobierno ta sigui cumpli cu su compromiso den “Programa di Gobernacion AVP-FUTURO 2025-2028” pa pone Oranjestad den centro di un desaroyo urbano sostenibel y inclusivo.
