Prome Minister di Aruba, mr. Mike Eman, durante di su participacion na e Caribbean Climate & Energy Conference, a expresa su sentimento mixto: un banda contento pa forma parti di e reflexion profundo riba e transicion energetico, pero tambe cu preocupacion pa e direccion cu Aruba a tuma despues di 2017.
Prome Minister Eman a enfatisa cu sin un “pakico” bon defini, ta facil pa perde e rumbo den e transicion pa energia limpi y renovabel. “Ora bo perde e pakiko bo ta perde e compromiso pa logra e transicion aki. E transicion aki ta pa provee coriente mas limpi y barata na pueblo y esey mester keda e enfoke pa mantene e compromiso cu ta transcuri cualkier gobernacion”.
Durante e conferencia, Prome Minister Eman a comparti dos tema importante: compromiso continuo y e bon comun. Sin continuidad, ta perde e meta pa e bon comun. Prome Minister ta elogia Aqualectra cu awo ta produci casi na 50% di energia renovabel y recien a instala e di 4 parke di molina y reduci e prijs di coriente cu 20%. A cana e caminda di transicion for di e dependencia di fossil fuel y heavy fuel oil pa produci energia limpi, uzando e biento y solo, locual ta e caminda riba Aruba tabata cana ora Aruba tabata lidera e vision aki den region.
Corsow, awe ta produci casi 50% di energia renovabel na un prijs di coriente reduci cu 20%. “Corsow ta implementa e mesun blueprint cu Aruba a diseña den nos tempo y a haci uzo di e modelo “RAS” – Reliable, Affordable y Sustainable. Nan a combina energia solar cu bateria grandi di 50 megawatt pa keda provee energia renovabel anochi.
Prome Minister Eman ta lamenta cu e vision cu su Gabinete Eman I y II a planta pa un Aruba berde, a termina den lachi na Bestuurskantoor. Segun Premier Eman, e Gobierno aki mester adopta un plan pa bolbe riba e podium regional di energia renovabel, cu e siguiente tres punto:
- Redobla capacidad di molinanan di biento na Vaderpiet, cambia molinanan cu ta genera 3 megawatt pa modelonan nobo cu ta genera 6 megawatt.
- Construi un parke di biento nobo pa yega te 60% di energia renovabel.
- Inverti den parke solar riba areanan di parkeo grandi manera hospital y hotelnan similar na esun di aeropuerto, combina cu baterianan di capacidad grandi pa warda energia genera durante dia pa uzo anochi.
Pa Prome Minister “esaki ta inacceptabel, ta cruel locual a haci cu e pueblo di Aruba, cu Gobierno anterior a laga deterioro den barionan, schoolnan, pobresa, maneho di desperdicio, y awe riba tereno di innovacion, Aruba a keda atras den desaroyo. “Tur e cosnan aki bo ta haci pa e bon comun y si bo no tin e strea ey di e bon comun bo dilanti, bo ta perde e proposito pa cual bo ta hacie”.
